Juristi Kreshnik Spahiu tha sot se Partia Demokratike i ‘pret’ zërat kundër që kur janë filiza dhe nuk i lë që të rriten.
Madje jo vetëm kaq, por kreu i saj Sali Berisha e pengon rrotacionin dhe bashkimin e partive të tjera për të krijuar një front të gjerë opozitar, duke e lënë sistemin bipolar.
“Nuk mendoj se do ketë krisje të PD-së, për disa arsye. E para për shkak të sistemit ka mundur të centralizojë mekanizmin politik dhe i ka prerë shkurt drutë që kur kanë qenë filiza, duke i nxjerrë jashtë partisë. Duke i nxjerrë jashtë partisë këta zëra kundër lidershipit shmang edhe çarjet brenda partisë apo fraksionet. Madje ata që kanë qenë zëra kundër janë edhe më të urryerit që edhe ne i kemi parë se si kanë kaluar, nga Lulzim Basha te Enkelejd Alibeaj. Unë mendoj se në PD nuk ndodh asgjë, sepse në atë parti ka një njeri dhe fatkeqësisht ai duhet të ishte që të mendonte për stafetën. Rruga e partisë është më e gjatë se e individit, sepse kështu është, nëse i ndodh diçka zotit Berisha, a do ulet qepeni i asaj partie, ose sikur të sëmuret dy muaj, kujt do i lihet, do drejtojë Albana Vokshi partinë? PD ka dalë nga misioni i saj dhe mund të bëhet pengesë për rrotacionin politik. Pra në zgjedhjet e vitit 2029 do jetë përsëri kjo PD që do pengojë partitë e reja në bashkim apo në forcimin dhe zgjerimin e opozitës. Prezenca e Berishës i pengon këta për zgjerim, lider opozitar dhe për të sjellë ndryshimin apo rrotacionin”, analizoi juristi për Report Tv.
Lufta brenda PD-së për devijim votash nuk kanë shumë rëndësi për kreun e PD-së, pasi për të partia nuk i preket. Për shumë vite të tjera, sipas juristit, dy krerët e PS dhe PD do vazhdojnë ta dominojnë politikën shqiptare dhe sistemin.
“Për Berishën këta janë numra, nuk ka rëndësi nëse është Alimehmeti apo Jorida Tabaku. Për Berishën kështu ndodh, vijnë rast pas rasti, Shtatori, Krishtlindjet, gjeli i detit e të tjera. Për më tepër kur ti thua jam me mision, pretendon se je i dërguar i Zotit. Një parti që mendon se e ka kryetarin e përjetshëm, do ndërhyjmë ne? E kanë zgjedhjen e tyre, mbase e kanë sukses atë formë. Edhe nëse e thotë Rama, ne nuk ndërhyjmë dot. Çështja është te sistemi elektoral, madje unë mendoj se ky është më i mirë se ai që do bëhet për 2029, se ai tjetri do bëhet më keq, më regresiv me Kodin Zgjedhor të ndryshuar, për të çimentuar rezultatin. Për sa kohë u jep zoti shëndet këta nuk lëvizin, të dy e dominojnë situatën politike dhe sistemin. Madje nuk i lënë mundësinë as fotokopjeve, teknologjisë, kompjuterit, këta vazhdojnë si në 90-ën, të fortët e lagjes, si në atë kohë dhe më e bukura është se ankohen po për këta, se i vodhën dhe nuk ruajtën votën. Këta nuk ndryshojnë, unë nuk mendoj se këta mendojnë apo se ndodh që ikën Berisha dhe vjen Flamuri dhe do ndryshojë situata apo PD-ja”, u shpreh Spahiu në analizën e tij se çfarë do ndodhë me PD-në pas zgjedhjeve dhe a largohet Berisha nga drejtimi.