Policia e Shtetit ka hapur konkursin për gradat drejtuese në radhët e uniformave blu.
Mediat kanë siguruar shkresën që mban firmën e Drejtorit të Përgjithshëm të Policisë, Muhamet Rrumbullaku drejtuar vartësve të tij ku thuhet se prej datës 17 Nëntor ka nisur gara për 572 funksione bosh.
Konkretisht janë shpallur 52 vende të lira për drejtues e drejtues i parë, si dhe 520 funksione bosh për kryekomisar e komisar.
Aplikimet zgjasin 1 muaj dhe duhet të përfundojnë më 17 Dhjetor, datë kur komisioni vlerësues do të nis seleksionimin e kandidatëve të cilët plotësojnë kriteret.
Pas kësaj faze, secili prej tyre do t’i nënshtrohen vlerësimit me shkrim dhe gojë ndërsa në vendimin final përllogaritet dhe performanca në detyrën që mbajnë.
Rihapja e konkursit për gradën drejtues i parë dhe drejtues vjen pas rreth 18 muajsh nga gara e fundit, nga ku dolën fitues rreth 58 efektivë nga 134 që aplikuan në total.
Ndërsa për gradat kryekomisar dhe komisar, nuk mund të thuhet e njëjta gjë, pasi konkursi për këto funksione rihapet pas më shumë se 5 vitesh.
