Paga mesatare në Shqipëri është rritur gjatë vitit 2023. Në tremujorin e dytë të vitit Instituti i Statistikave vlerëson se paga mesatare mujore bruto për një të punësuar shkoi në 70.905 Lekë (665 euro).
Në krahasim me të njëjtin tremujor të vitit të kaluar, paga mesatare është rritur me gati 17 %. Në sektorin shtetëror paga mesatare arriti në 82.207 Lekë (770 euro), ndërsa në atë privat 65.901 Lekë (618 euro).
Sa i përket pagave në sektorin publik ato duket se janë thuajse njësoj me ato në Kosovë. Ndryshimi qëndron te sektori privat ku në Kosovë pagat janë dukshëm më të ulëta.
Shifrat e fundit i bëri publik kryeministri i Kosovës, Albin Kurti:
Paga mesatare në sektorin privat në Kosovë është 470 euro, ndërkaq në atë publik është 700 euro. Të punësuar në sektorin privat janë rreth 340 mijë qytetarë, kurse në atë publik rreth 80 mijë qytetarë.
Secili pjesëtar i NjSI ka pajisje në vlerë prej afër 10 mijë euro. Të ardhurat mesatare të shumicës dërrmuese të pjesëtarëve të kësaj njësie elitare sivjet shkuan mbi 2.200 euro në muaj (paga bazë plus shtesat). Tash do ta kenë edhe shtesën e rrezikshmërisë prej 150 euro në muaj, përderisa vazhdon kjo situatë në veri të vendit, e që është niveli më i lartë i kësaj shtese. Në fund të muajit nëntor i bie që përveç pagës së rritur, secili prej tyre do të marrë edhe shumën neto prej 1.350 euro retroaktivisht (shtesa e rrezikshmërisë shkurt-nëntor 2023).
Nevojat, jo vetëm dëshirat, janë përherë e shumë herë më të thjeshta se zgjidhjet. Jetojmë në Kosovë, ku BPV për kokë banori në muaj është rreth 460 euro. E sivjet, 2.134 policë të Kosovës, apo gati 27% morën më shumë se 1.000 euro në muaj mesatarisht. Janë 203 policë të Kosovës që sivjet patën të ardhura më të larta sesa Presidentja e Republikës (1.890 euro bruto, koeficienti 18), e në muajt qershor e korrik ishin afër 700 sosh (ku sigurisht bëjnë pjesë shumica absolute e pjesëtarëve të NjSI).
Ju falemnderit pjesëtarëve të NjSI-së për shërbimin ndaj atdheut dhe zbatimin e ligjit.
