Në episodin më të fundit të podkastit “Flasim”, gjatë rubrikës “Shënimet e Javës”, kryeministri Edi Rama foli për hapat e radhës në drejtim të digjitalizimit të shërbimeve publike në vend.
Ai nënvizoi se Shqipëria po përgatitet për një kapërcim të rëndësishëm teknologjik, ku karta e identitetit do të mund të përdoret në formë digjitale, përmes celularit apo kompjuterit, duke u shndërruar në një portofol elektronik shumëfunksional.
Gjithashtu, Rama prezantoi edhe projektin për portën biometrike në aeroportin “Nënë Tereza”, e cila do të lejojë udhëtarët të hyjnë në vend pa ndalesa dhe pa kontroll tradicional të pasaportës, vetëm përmes verifikimit të pamjes dhe të dhënave të tyre të lidhura elektronikisht.
Rama bëri të ditur se kompania shtetërore Identitek, e krijuar pas përfundimit të koncesionit të mëparshëm për prodhimin e kartave të identitetit, ka përmbushur me sukses sfidën e parë, prodhimin e dokumenteve të identitetit më cilësore dhe më të lira.
Sipas tija, kompania tashmë, është angazhuar në një fazë të re – kalimin e kartës së identitetit në pajisje digjitale.
“Kompania Identitek tashmë është angazhuar për sfidën e re të identitetit digjital, pra kalimin e kartës së identitetit në celular apo kompjuter dhe funksionimin e saj si një portofol digjital shumëfunksional,” – tha Rama.
Ai shtoi se ky projekt është në përputhje me objektivat e Bashkimit Europian, i cili ka vendosur vitin 2027 si afatin për futjen e identitetit digjital në jetën e përditshme të qytetarëve europianë. Ndërkohë, Shqipëria synon ta ketë gati këtë sistem në fillim të vitit 2026.
Një tjetër risi që u prezantua në podkast është futja e kontrollit digjital në aeroportin ndërkombëtar të Tiranës. Rama njoftoi se po përgatitet një sistem inovativ që do të lejojë hyrjen në vend pa ndalesa dhe pa kontroll tradicional të pasaportës.
“Një tjetër inovacion i bukur që po përgatisim është hyrja në Shqipëri nga aeroporti ‘Nënë Tereza’ pa asnjë ndalesë dhe pa kontroll pasaporte, por përmes një porte digjitale, të cilës i mjafton pamja jote për të verifikuar identitetin tënd, duke e lidhur atë elektronikisht me biletën dhe me të dhënat e tua,” – u shpreh Kryeministri.
Sipas tij, aeroporti i Tiranës, tashmë i njohur për kontrollin digjital të pasaportave, do të bëhet i pari në Europë që implementon portën digjitale të hyrjes.
Rama e cilësoi këtë zhvillim si një hap të madh për vendin, duke theksuar se teknologjia digjitale po i jep mundësi vendeve në zhvillim të realizojnë kapërcime epokale.
“Kjo falë bekimit të teknologjisë digjitale, e cila u jep mundësi vendeve në zhvillim të bëjnë kapërcime epokale që, përndryshe, do të ishin të pamundura,” – përfundoi ai.