Presidenti rus Vladimir Putin ka sinjalizuar se Moska nuk do të tërhiqet nga kërkesat e saj kryesore për përfundimin e luftës në Ukrainë, ndërsa gjatë një takimi në Kremlin me të dërguarit amerikanë ka propozuar një armëpushim të përkohshëm humanitar në një zonë të vijës së frontit.
Gjatë bisedimeve me Jared Kushner dhe Steve Witkoff, të cilët mbërritën në Moskë pas takimeve në Abu Dhabi, Putin përjashtoi çdo kompromis mbi territoret që Rusia pretendon se i ka aneksuar nga Ukraina.
Ai hodhi poshtë gjithashtu mundësinë e vendosjes së trupave të huaja paqeruajtëse në Ukrainë, duke e cilësuar një lëvizje të tillë si “vazhdim të luftës”.
Lideri rus refuzoi idenë e krijimit të zonave të çmilitarizuara mes forcave ukrainase dhe ruse, duke deklaruar se për Rusinë ekziston vetëm një vijë ndarëse: kufiri shtetëror.
Në të njëjtën kohë, Putin propozoi një mision humanitar në qytetin Kostyantynivka, ku sipas Moskës vazhdojnë të jetojnë qindra civilë. Sipas tij, nisma do të ngjante me armëpushimin e përkohshëm që lejoi evakuimin e banorëve nga qyteti Oleshky në Ukrainën jugore.
Deklaratat e Putinit vijnë në një moment kur përpjekjet diplomatike për t’i dhënë fund konfliktit janë intensifikuar. Megjithatë, qëndrimi i Kremlinit duket se zbeh shpresat për një zgjidhje të afërt politike, ndërsa presidenti ukrainas Volodymyr Zelenskyy ka deklaruar se ekziston ende një “dritare mundësie” për arritjen e një marrëveshjeje para vitit 2027.
Ndërkohë, SHBA-ja po kërkon përfshirjen e përfaqësuesve evropianë në raundin e ardhshëm të negociatave. Kievi dhe kryeqytetet evropiane kanë kundërshtuar çdo përpjekje për ta trajtuar luftën si pjesë të një marrëveshjeje më të gjerë për sigurinë evropiane, duke insistuar se prioritet mbetet përfundimi i konfliktit në Ukrainë.
Rreth 50 liderë evropianë u mblodhën në Dublin për të diskutuar mbi sigurinë e kontinentit dhe zhvillimet e fundit diplomatike. Presidenti francez Emmanuel Macron bëri thirrje për një qëndrim të bashkuar evropian në raport me negociatat për Ukrainën dhe Rusinë.
Pavarësisht bisedimeve diplomatike, luftimet vazhdojnë. Sulmet ajrore ruse gjatë natës goditën një ndërtesë banimi në Kiev, duke shkaktuar viktima, ndërsa në Shën Petersburg një shpërthim me makinë-bombë vrau një ushtarak rus.
Pas Abu Dabit, ofensiva diplomatike u zhvendos në Kremlin.
Të dërguarit specialë të presidentit amerikan, Donald Trump, Steve Uitkof dhe Xhared Kushner, shtrënguan duart me liderin e Rusisë, Vladimir Putin, përpara se të bisedonin për fundin e luftës në Ukrainë. Në mes të Kremlinit, në tryezën e rrumbullakët, hartat u nxorën, por nga presidenti rus që po kërkon të caktojë kufirin.
“Sa i përket qëndrueshmërisë, përsosmërisë dhe besueshmërisë së paqes, edhe ne do të dëshironim që kjo paqe të ishte e përjetshme. E dimë se të dyja palët, Rusia dhe Ukraina, kanë qëndrime të ndryshme për çështjen e territoreve. E dimë se pala ukrainase ngre çështjen e të ashtuquajturave ‘zona gri’. Dhe kjo, siç e kam thënë tashmë, do të mbetet gjithmonë një pikë mosmarrëveshjeje. Për ne ekziston vetëm një vijë demarkacioni: kufiri shtetëror”, deklaroi Putin.
Megjithatë për Putinin, kufiri rus përfshin 30% të territorit të Ukrainës, që aktualisht është nën pushtim dhe i aneksuar. Nga ana tjetër, në tryezë u përmendën edhe europianët.
“Çfarë dëgjojmë prej europianëve? Se sapo të nënshkruhet një marrëveshje paqeje, ata do të vendosin menjëherë trupa në Ukrainë. Ne kemi folur tashmë për këtë: ky është një objektiv legjitim për ne, kështu që lufta do të rifillojë menjëherë. Ne do të donim shumë që ju, zotërinj të nderuar, dhe administrata amerikane në tërësi të punoni me aleatët tuaj europianë në mënyrë që ata më në fund të vendosin nëse duan paqe apo luftë në Ukrainë”, theksoi Putin.