Më 16 dhjetor SPAK i kërkoi Parlamentit heqjen e imunitetit të zëvendëskryeministres dhe njëherësh ministres së Energjisë dhe Infrastrukturës Belinda Balluku.
Pas vendimit të Gjykatës Kushtetuese më 12 dhjetor, e cila e ktheu sërish në detyrë, çështja Balluku mbetet një ndër më zjarrtat e opinionit publik.
Lëvizja e radhës e SPAK ka ngjallur jo pak reagime, ndër të parët që reagoi ishte kryeministri Edi Rama, por të shumtë ishin ata që reaguan edhe nga radhët e opozitës.
Kreu i grupit Parlamentar Gazment Bardhi ka bërë një reagim në rrjetet e tij sociale, ku ka shkëputur një fragment nga kërkesa e SPAK.
“Edi Rama nuk ka më alibi! Rreziku për intimidimin e dëshmitarëve dhe prishja e provave është e vetmja arsye pse ekzistojnë masat e sigurimit. SPAK me metoda speciale hetimi ka provuar se Belinda Ballukun ka intimiduar dëshmitarët. Provat ekzistojnë, i ka sjell edhe në Kuvend, por Niko Peleshi i ka mbyllur në kasafortë. Vonesat, kasafortat dhe fshehja e fakteve janë vetëm manovra të dëshpëruara të Edi Ramës për të blerë kohë.
Çdo minutë shtesë që Belinda Balluku mbahet në detyrë është një zgjedhje politike e Edi Ramës. Një zgjedhje për të mbrojtur veten!
Por nuk ka më as rrugëdalje për kryeministrin e Republikës së Korrupsionit! Edi Rama duhet të zgjedhë: të dorëzojë të pandehurën Belinda Balluku, ose të mbajë përgjegjësi për pengimin e drejtësisë. Rrugë të mesme nuk ka!”, shkroi Bardhi.
Emisioni “Opinon” në Tv Klan i cili mbrëmjen e kësaj të mërkure u ndal tek çështja Balluku, ngriti pyetjen se ku Gazment Bardhi e kishte marrë këtë fragment, i cili sipas SPAK supozohej të ishte një sekret hetimor. Pas kërkesës publike të gazetarit Blendi Fevziu për të dhënë sqarime, Gazmend Bardhi reagoi në “Opinion”, ku shkruan: Materiali është marrë nga dosja te kërkesa që ka sjellë SPAK, faqja 6 e kërkesës.
Megjithatë pikëpyetja ngelet e njëjtë: A ka shkelur Gazment Bardhi ka shkelur ligjin duke publikuar një kërkesë të një institucioni të lartë të drejtësisë?!