Pas 31 ditësh protestash të karakterizuara nga thirrjet për dorëheqjen e kryeministrit Edi Rama, protesta e sotme ka shënuar një ndryshim të fortë në retorikë.
Për herë të parë, nga podiumi i ngritur para Kryeministrisë është artikuluar hapur një paralajmërim për “rrëzimin” e kryeministrit, i shoqëruar me një skenografi që rikujton një nga momentet më të forta të historisë politike shqiptare, rrëzimin e bustit të Enver Hoxhës në shkurt të vitit 1991.
Një protestues ka nxjerrë në shesh një figurë të madhe të Edi Ramës, të montuar si busti i ish-diktatorit komunist, ndërsa para qytetarëve ka deklaruar se koha e kërkesave për dorëheqje po i lë vendin një faze tjetër të protestës.
“Kemi sjellë Ramën për të bërë provat finale përpara se ta rrëzojmë. Ne po i themi dorëhiqu, por ai nuk po na dëgjon. Kështu që fillojmë të përgatitemi për ta rrëzuar. Gjenerata Z, të gjithë bashkë: O dorëzohu, o rrëzohu!”, deklaroi ai.
Deklarata u shoqërua me brohoritje nga një pjesë e protestuesve, ndërsa figura e Ramës e ngjashme me bustin e Enver Hoxhës u ngrit përpara godinës së Kryeministrisë.
Protesta, e cila ka hyrë në ditën e 32-të, deri më tani është zhvilluar kryesisht me thirrje për dorëheqjen e kryeministrit dhe ndryshim të klasës politike. Mesazhi i sotëm përbën një përshkallëzim të gjuhës së përdorur nga një pjesë e protestuesve, të cilët paralajmëruan se nuk do të heqin dorë nga aksionet e tyre deri në largimin e Edi Ramës nga pushteti.
