Në Beograd, dhjetra mijëra qytetarë të udhëhequr nga lëvizja e studentëve, një ditë më parë morën pjesë në një nga protestat më të mëdha që nga rënia e Slobodan Millosheviçit.
Në lidhje me këtë tubim historik të popullit serb, ka reaguar edhe Komisionerja e BE-së, Marta Kos ku përmes një postimi në rrjetet sociale shkruan se ata demonstruan në mënyrë paqësore.
“Një numër i paprecedentë i qytetarëve serbë demonstroi në mënyrë paqësore sot në Beograd, duke bërë thirrje për sundim të ligjit dhe institucione të forta dhe të përgjegjshme demokratike. Falenderoj të gjithë ata që siguruan sigurinë e tyre. Një marrëveshje për reformat, të cilat janë të nevojshme për rrugën e Serbisë në BE duhet të pasojë”, shkroi Marta Kos në X.
Protesta e djeshme u konsiderua si më e madhja përgjatë këtyre 4 muajve protesta që kanë sfiduar pushtetin autokratik të presidentit Aleksandar Vuçiç, ndërsa shifra e pjesëmarrjes prej 107 mijë veta u konfirmua nga ministria e Brendshme e Serbisë.
Studentë dhe qytetarë të tjerë kërkuan përgjegjësi penale dhe politike për tragjedinë në Novi Sad ku 15 persona humbën jetën si pasojë e shembjes së një strehe betoni në stacionin hekurudhor më 1 nëntor 2024.
Deri më tani, mbi dhjetë persona janë akuzuar për shembjen e çatisë, ndërkohë Kryeministri Millosh Vuçeviç, dha dorëheqjen në janar, së bashku me kryetarin aktual të bashkisë.
Vuçiç, i cili shihet si njeriu që sakrifikoi kryeministrin për të ruajtur pozicionin e tij, ka refuzuar formimin e një qeverie kalimtare dhe mbajtjen e zgjedhjeve brenda gjashtë muajve. Ai ka akuzuar Perëndimin për organizimin e protestave me synimin për ta larguar nga pushteti dhe për të “shkatërruar Serbinë”, duke përdorur një narrativë të ngjashme me atë ruse.
Një grup eurodeputetësh i ka dërguar një letër presidentes së Komisionit Europian, Ursula von der Leyen, duke paralajmëruar se “reagimi i Serbisë ndaj protestave do të jetë një provë vendimtare e angazhimit të saj ndaj standardeve të BE-së”.