Ministrja e Shtetit për Marrëdhëniet me Parlamentin, Erjona Ismaili, ka reaguar mbi protestën e dhunshme të zhvilluar në Tiranë, me akte vandalizmi, djegie dhe dëmtime të pronës publike e private.
Në një reagim të publikuar, ajo dënon dhunën dhe shkatërrimin, duke theksuar se demokracia, liria dhe shteti i së drejtës nuk cenohen nga dëmtimi i godinave.
Ismaili akuzon organizatorët për nxitjen e akteve të dhunshme dhe për përdorimin e të rinjve në funksion të interesave politike. Ajo e mbyll reagimin me apelin që dhuna të mos zhvillohet në kurriz të të rinjve dhe të Shqipërisë europiane.
“Shqipëria sot nuk digjet dot se i vutë flakën mureve, as se thyet xhama, as se shkulët semaforët.
Se, në fakt, demokracia, liria, zbatimi i ligjit nuk garantohen nga mure e godina.
Institucionet janë ligjet, rregullat dhe fryma që ato përcjellin, në përputhje me standardet europiane, të cilat nuk mund të nxihen as nga tymi i pishave dekorative, as nga tryezat e punës të bastisura prej mendjes suaj, që armikun më të madh ka të bukurën.
Sot u dogjën biznese, institucione, pemë prej atyre që rininë e kanë parë asgjë më shumë e asgjë më pak sesa mish për top.
Sot, kur shkollat janë të investuara e të rikonstruktuara, apo të ndërtuara të reja, sot kur të rinjtë paguhen më mirë, sot që u garantohen sigurimet shoqërore, sot që pensionet janë rritur, sot që financohen projekte e ide, që mbështeten doktoratura e studime shkencore, sot që ofrohet kredia studentore njësoj si në çdo vend europian, sot që ofrohen shtëpi me kredi të butë, shtëpi me interes 0%, sot që garantohet siguria dhe rendi, sot që kemi turizëm gjithëvjetor, sot që mbështetet fermeri, sot që mbështeten bizneset e vogla dhe të mesme, sot që ka programe për studentët ekselentë, praktika pune.
Këto nuk fshihen, nuk harrohen e nuk zhbëhen as me flakë e as me dhunë. Nuk zhbëhen as me godina të shkatërruara.
Shteti qëndron i fortë nga politikat, nga nismat, nga projektet e programet që shkojnë bashkë me vizionin.
Pedagogë që kërcënojnë studentët për të dalë në shesh, duke harruar se dega e PD-së është tjetërkund, larg auditorëve.
Nëse huliganët thyejnë, djegin e shkatërrojnë, e konsideroni se është faji i policisë që nuk u garanton siguri, ama nëse policia ndërhyn, e konsideroni dhunë ndaj protestuesve.
Hip se të vrava, zbrit se të vrava!
Sot është e njëjta dorë që nuk e duronte dot qetësinë e protestës qytetare, adresimin e çështjeve përmes dialogut dhe përjashtimin që protestuesit paqësorë u bënin atyre. Natën, në fshehtësi, organizuan atë që dinë të bëjnë më mirë, atë që mezi e mbajtën deri sot; djegien, shkatërrimin dhe prishjen e imazhit të Shqipërisë. Një padurim për pushtetin që e dinë se nuk do ta kenë, mesazhin për të cilin e morën edhe nga shpërfillja që protokollet e partnerëve tanë ndërkombëtarë i bënë kryetarit të tyre.
Në mes të gjithë këtij organizimi e pas tij është e njëjta dorë që, si kufomë politike, e vdekur dhe e pakallur ende, kërkon të ushqejë me gjak etjen e tij për pushtetin e munguar.
Krejt e kuptueshme përse, dëshpërimisht, pas çdo kapitulli që mbyllet me BE-në, ju doni të hapni një kapitull të ri dhune në Shqipëri.
Por jo mbi kurrizin e të rinjve dhe jo mbi kurrizin e Shqipërisë europiane”, shkruan Ministrja.
Burimi: Politika