Oligarku që ka kapur shëndetësinë në Shqipëri, Klod Allajbeu është një nga financuesit e Shkëlzen Berishës. Bëhet fjalë për pagesa në rrugë bankare dhe me fatura të dyshuara si fiktive. Për shkak të këtij raporti, Sali Berisha dhe deputetët e tij janë treguar gjithmonë të kujdeshëm duke evituar çdo koment apo denoncim për aferat e panumërta korruptive të Allajbeut me qeverinë e Edi Ramës. Me kërkesë të PD-së është ngritur edhe një komision hetimor për koncesionet e sterilizimit dhe check-up, ndërsa ka mbyllur gojën për dy koncensionet e tjera korruptive, atë të hemodializës 84 milionë euro dhe laboratorëve 130 milionë euro, pasi pas tyre qëndron Allajbeu.
Dy koncensionet janë konstatuar nga KLSH si korruptive, ndërsa si të tilla po hetohen nga SPAK. Allajbeu kontrollon sot Ministrinë e Shëndetësisë, QSUT, FSDKSH, spitalet rajonale, spitalet private, depot farmaceutike etj. Ka diktuar emërimet nga ministrja Evis Sala deri tek drejtorët. Klod Allajbeu, përmes fijeve të tij, kontrollon asgjesimin e mbetjeve spitalore dhe tenderat e ilaçeve. Megjithatë, emri i tij, bëmat e tij apo qoftë edhe një aferë e tij nuk është lakuar kurrë nga asnjë përfaqësues i PD. Thirrja ‘opozitë e shitur’ është plotësisht e bazuar.
Për herë të parë, emri i Klod Allajbeut nga opozita është lakuar dje nga Sekretari i Përgjithshëm i PD-së, Flamur Noka, i cili shkruan se ministrja e Shëndetësisë Evis Sala punon për llogari të Allajbeut. “Evis Sala nuk po drejton shëndetësinë, por po vepron për llogari të Klodian Allajbeut Teksa lë mbi mijë qytetarë pa mjekë specialistë, grumbullon dhjetëra mjekë në qendra ku mungojnë edhe ambientet edhe pacientët. Ky nuk është reformim i shërbimit shëndetësor, por manovrim në funksion të interesave klienteliste Shqiptarët duan që shëndetësia t’u shërbejë atyre, jo klientëve të Edi Ramës“, shkruan Noka.
Flamur Noka është në dijeni se Allajbeu është një nga klientët e Shkëlzenit. Ndaj mesazhi i tij është i qartë. Jo vetëm kaq, por postimi i Nokës në Facebook është pasqyruar edhe në faqen e syri.net, media e Familjes Berisha. Kjo të bën të besosh se mesazhi i Nokës për Allajbeun mund të jetë diktuar nga Shkëlzen Berisha.
Po çfarë fshihet pas postimit të Nokës se Ministria e Shëndetësisë është në funksion të Allajbeut? Tre janë versionet e mundshme;
1. Klod Allajbeu mund të ketë pakësuar apo ndërprerë pagesat për Shkëlzenin dhe Syri Tv.
2. Shkëlzeni dhe Allajbeu janë prishur në ndonjë pazar ose Shkëlzeni po i bën presion për rritjen e tarifës.
3. Pas 13 vitesh PD-ja vendos të heqë dorë nga opozita e shitur dhe të bëjë opozitë të vërtetë.
