Christine Lagarde do të japë dorëheqjen si presidente e Bankës Qendrore Evropiane, BQE më 7 shkurt 2027, njoftoi banka të enjten. Dorëheqja vjen rreth nëntë muaj para se të mbaronte mandati i saj 8-vjeçar.
Njoftimi erdhi ndërsa BQE-ja përgatitej të zbulonte vendimin e saj të fundit për normën e interesit. Lagarde informoi Këshillin Drejtues të BQE-së, i cili përcakton normat e interesit për eurozonën, dhe Presidentin e Këshillit Evropian Antonio Costa për vendimin e saj, tha banka në një deklaratë. BQE nuk dha asnjë arsye për largimin e saj.
“Këshilli Drejtues e falënderoi ngrohtësisht Presidenten Lagarde dhe e duartrokiti gjatë”, thuhet në deklaratë.
Presidenti i Këshillit Evropian, Antonio Costa, e ka falënderuar Lagarde për shërbimin e saj, duke vlerësuar përkushtimin e saj si Presidente e Bankës Qendrore Evropiane që nga nëntori i vitit 2019.
“Për të siguruar një tranzicion të qetë drejt udhëheqjes së ardhshme të BQE-së, procesi për emërimin e pasardhësit të saj do të fillojë sot dhe do të vazhdojë pa vonesë”, tha Costa.
Pasardhësi i saj do të emërohet nga Këshilli Evropian, i cili mbledh së bashku udhëheqësit e BE-së. Sipas rregullave të BE-së, presidenti emërohet me shumicë të kualifikuar votash, pas një rekomandimi nga ministrat e financave të BE-së dhe konsultimeve me Parlamentin Evropian dhe Këshillin Drejtues të BQE-së.
The post Presidentja Bankës Qendrore Evropiane do të japë dorëheqjen disa muaj para mbarimit të mandatit të saj appeared first on Euronews Albania.
Burimi: Botë