Pas Sali Berishës, radhën për të marrë rrugën drejt Shteteve të Bashkuara e ka Edi Rama. Dy kundërshtarët politikë në Tiranë duket se bashkohen të paktën në një pikë: udhëtimet përtej Atlantikut kanë shumë diasporë në axhendë, por shumë më pak Uashington.
Kryeministri do të jetë në SHBA për Asamblenë e Përgjithshme të Kombeve të Bashkuara në Nju Jork, punimet e së cilës zhvillohen nga 22 deri më 28 shtator. Këtë vit Shqipërinë do ta përfaqësojë Rama dhe jo Presidenti Bajram Begaj, ndërsa sipas axhendës paraprake, kreu i qeverisë pritet të mbajë fjalën më 25 shtator.
Pjesëmarrja në Asamblenë e Përgjithshme, megjithatë, është pjesë e kalendarit rutinë diplomatik të shtetit shqiptar dhe jo një vizitë dypalëshe në SHBA. Ashtu si gjithë liderët e tjerë, edhe Rama do të shkrepë një foto me presidenin Trump, por kaq. Një foto rutinë.
Ndërkohë nuk rezulton të jetë njoftuar ndonjë takim i Ramës me zyrtarë të lartë të administratës amerikane. Trump bën dy vite në krye të Shtëpisë së Bardhë dhe Rama deri më sot nuk ka zhvilluar asnjë vizitë zyrtare në SHBA që të pritet nga administrata vendase.
Këtu udhëtimi i Ramës ngjan jo pak me atë të Berishës. Kreu i PD-së udhëtoi së fundmi drejt SHBA-së, por aktivitetet e tij u përqendruan kryesisht te takimet me komunitetin shqiptar. Tani edhe Rama do të bëjë mijëra kilometra për të takuar shqiptarët në Amerikë, pasi nuk e pret askush nga adminsitrata e Trump.
Sipas njoftimeve të deritanishme, më 20 shtator Rama pritet të zhvillojë një takim me shqiptarët në Miçigan. Ish-ministri Dritan Demiraj ka bërë ndërkohë thirrje për protestë kundër kryeministrit gjatë këtij aktiviteti.
Por pikërisht këtu shfaqet edhe detaji më interesant politik i axhendës. Në mbrëmjen ku Rama ka konfirmuar pjesëmarrjen, organizatorët kanë parashikuar të nderojnë Donald Trump me titullin “Knight of the Order of Scanderbeg”.
Në mungesë, të takimeve, duket se Rama këkron ‘ta bëjë për’ vete presidentin amerikan me dekorime të kësaj natyre, sigurisht dekorime nga larg pasi Trump nuk pritet të marrë pjesë në një aktivitet të tillë. /Pamfleti