Mbahet edhe këtë të Enjte në orën 10:00 seanca plenare në Kuvend. Sot pritet të mbahet interpelancë urgjente me Ministren e Arsimit dhe Sportit Ogerta Manastirliu me kërkesë të grupit të PD-së.
Opozita e kërkoi interpelancën që pas vrasjes së 14 vjeçarit pranë shkollës “Fan Noli” në kryeqytet. Ata kanë argumentuar se kjo ngjarje mund të ishte parandaluar, duke shtuar se ka mungesë sigurie për të miturit në shkolla.
Kujtojmë se edhe në protestat e zhvilluara javët e fundit para Ministrisë së Arsimit, qytetarët kanë parashtruar një sërë kërkesash që kanë si qëllim mbrojtjen e të miturve. Mes kërkesave të tyre, është edhe ajo për dorëheqjen e Manastirliut.
Kjo seancë vjen pas asaj të së Hënës kur u miratua buxheti 2025, për të cilin pati një sërë debatesh mes palëve politike. Nga njëra anë, mazhoranca prezantoi projektet për vitin e ardhshëm, ndërsa demokratët vijuan me akuzat e tyre se të gjitha janë propagandë para zgjedhjeve elektorale.
Sot do të miratohen edhe disa projekt-vendime që mund të shihni duke klikuar këtu!
/a.r