Kryeministrja italiane Giorgia Meloni deklaroi se Italia mbetet e përkushtuar ndaj unitetit të Perëndimit, duke hedhur poshtë akuzat për ndryshim qëndrimi në raport me Shtetet e Bashkuara dhe duke mbrojtur një sërë politikash të qeverisë së saj, nga reforma zgjedhore deri te paga minimale dhe menaxhimi i pandemisë.
Në një intervistë për emisionin “10 Minuti” në Rete 4, Meloni tha se nuk ka ndryshuar qëndrimin e saj ndaj SHBA-së.
“Nuk jam antiamerikane sot dhe nuk kam qenë e nënshtruar dje. Jam një person që beson se Perëndimi është më i fortë kur është i bashkuar dhe kam punuar për këtë. Marrëdhëniet e forta ndërtohen mbi sinqeritetin dhe unë kam qenë gjithmonë e sinqertë“, deklaroi ajo.
Duke komentuar një video ku shihej duke bërë gjeste gjatë një bisede me presidentin amerikan Donald Trump, Meloni sqaroi se nuk kishte asnjë domethënie politike. “Po flisja dhe jam një person që gjestikulon shumë,” u shpreh ajo.
Lidhur me përdorimin e bazave ushtarake amerikane në Itali, Meloni i cilësoi “shumë të pasakta” deklaratat e sekretarit të përgjithshëm të NATO-s, Mark Rutte.
Sipas saj, Italia ka autorizuar vetëm aktivitetet e parashikuara në marrëveshjet ekzistuese dhe që “nuk përfshijnë veprime sulmuese”.
Reforma zgjedhore
Kryeministrja mbrojti edhe reformën zgjedhore që po diskutohet në Itali, duke thënë se ajo nuk favorizon partitë politike, por qytetarët.
“Sistemi u jep zgjedhësve mundësinë të vendosin se kush fiton dhe i garanton fituesit numrat për të qeverisur me qartësi“, tha Meloni.
Ajo akuzoi kundërshtarët politikë se e kundërshtojnë reformën sepse “kanë qeverisur pa fituar zgjedhjet” dhe duan të vazhdojnë me “lojërat e pallatit”.
Meloni tha se establishmenti italian e sheh si kërcënim mundësinë që në të ardhmen Presidenti i Republikës të vijë nga e djathta.
“Supozohej se disa gjëra nuk mund të ndryshonin, por u tregua se mund të ndryshonin. Nuk përjashtohet që të thyhet edhe kjo tabu dhe Italia të ketë një president që nuk vjen nga e majta“, deklaroi ajo.
Sipas saj, kjo do të ishte një tjetër dëshmi se qytetarët që nuk janë të majtë “nuk janë bij të një Zoti më të vogël” dhe kanë të njëjtat të drejta për të drejtuar vendin.
Sulm ndaj opozitës dhe Vannacci
Duke komentuar figurën e gjeneralit Roberto Vannacci, Meloni tha se nuk sheh dallime të mëdha mes tij dhe partive të opozitës.
“Nuk më duket se ka ndonjë ndryshim të madh. Votojnë si e majta dhe flasin kundër nesh gjatë gjithë ditës“, u shpreh ajo.
Ajo shtoi se është e vështirë të ndërtohet diçka me ata që, sipas saj, synojnë vetëm të shkatërrojnë.
Në lidhje me pagën minimale, Meloni përsëriti kundërshtimin e saj ndaj një norme të detyrueshme të vendosur nga shteti.
Sipas saj, modeli i “pagës së drejtë”, i negociuar mes sindikatave dhe organizatave të punëdhënësve, është më liberal dhe më efektiv.
“Nuk jam bërë aspak e majtë. E majta prej dekadash nuk merret më me punëtorët, pagat dhe përmirësimin e kushteve të tyre. Këtë e kemi bërë ne përmes masave që po japin rezultate,” përfundoi Meloni.
