Ngjarja ndodhi në autostradën A1, pranë Barberino del Mugello në Firence. 45-vjeçarja kishte arritur të telefononte 112 dhe një mik për të kërkuar ndihmë, ndërsa policia u vu në kërkim të automjetit. Hetuesit po verifikojnë nëse gruaja ishte vrarë përpara se të hidhej nga ura.
Një ngjarje e rëndë ka ndodhur në Firence të Italisë, ku një 36-vjeçar dyshohet se i zuri pritë ish-partneres së tij, e detyroi të futej në bagazhin e makinës dhe më pas e çoi drejt autostradës A1, ku e hodhi nga një urë. Menjëherë pas kësaj, burri u hodh edhe vetë dhe humbi jetën.
Ngjarja ndodhi në zonën e Barberino del Mugello. Burri është identifikuar si Federico Vella, 36 vjeç, ndërsa viktima ishte Lorena Isceri, 45 vjeçe, me origjinë nga Lecce. Sipas rindërtimit të deritanishëm të ngjarjes, Vella dyshohet se i kishte zënë pritë ish-partneres në garazhin e banesës së saj në Firence. Ai dyshohet se e bllokoi, e futi në bagazhin e automjetit dhe u nis drejt autostradës A1.
45-vjeçarja arriti të kërkonte ndihmë. Ajo kontaktoi numrin e emergjencës 112, si edhe një mik të saj. Pas telefonatës, policia e Firences urdhëroi nisjen e kërkimeve për automjetin përgjatë autostradës.
Kur patrulla e Policisë Rrugore e lokalizoi makinën dhe efektivët tentuan t’i afroheshin 36-vjeçarit, ai ndodhej në skajin e urës. Burri u hodh dhe humbi jetën. Ekipet e shpëtimit gjetën fillimisht trupin e tij dhe, pak më larg, edhe trupin e 45-vjeçares. Makina e çiftit ndodhej e ndaluar në anë të rrugës.
Sipas pistës së hetimit, 36-vjeçari dyshohet se e kishte hedhur ish-partneren nga ura përpara se të hidhej vetë. Megjithatë, hetuesit po përpiqen të përcaktojnë nëse gruaja ishte ende gjallë në atë moment apo ishte vrarë më parë. Prokuroria ka urdhëruar autopsinë për të përcaktuar shkakun dhe kohën e vdekjes.
Një rol të rëndësishëm në rindërtimin e ngjarjes pritet të kenë kamerat e sigurisë përgjatë autostradës A1 dhe kamerat trupore të policëve, të cilat kanë regjistruar pjesë të asaj që ndodhi. Hetimet po koordinohen nga prokurori Antonio Natale dhe po zhvillohen nga skuadra hetimore e Firences, e drejtuar nga Domenico Balsamo.