Një student 24 vjeçar hapi zjarr të enjten në një universitet të Pragës, duke vrarë të paktën 14 persona, thanë zyrtarët dhe duke plagosur më shumë se 20 nga të shtënat masive, në një nga ngjarjet më të rënda në historinë e Republikës Çeke.
Gjakderdhja ndodhi në ndërtesën e departamentit të filozofisë të Universitetit Charles, ku vrasësi ishte një student, tha shefi i policisë së Pragës, Martin Vondrasek. Autoritetet thanë se autori i armatosur vdiq.
Vondrasek tha në mbrëmje se 14 persona kishin mbetur të vdekur dhe 25 u plagosën, pasi më herët u raportua se 15 kishin vdekur dhe 24 ishin plagosur. Autoritetet paralajmëruan se numri i të vdekurve mund të rritet.
Policia nuk dha detaje rreth viktimave apo motiveve të mundshme të të shtënave në ndërtesën e vendosur pranë lumit Vltava në sheshin Jan Palach. Ministri i Brendshëm çek Vit Rakusan tha se hetuesit nuk dyshojnë për lidhje të agresorit me ndonjë ideologji apo grup ekstremist.
Vondrasek tha se policia beson se personi i armatosur para masakrës vrau babanë e tij në qytetin e tij të lindjes, Hostoun, në perëndim të Pragës, dhe se ai gjithashtu kishte planifikuar të vriste veten, por pa dhënë detaje.
Vondrasek tha se në bazë të një kontrolli në shtëpinë e tij, i armatosuri dyshohej gjithashtu për vrasjen e një burri tjetër dhe vajzës së tij 2-muajshe, më 15 dhjetor, në Pragë.
Shefi e përshkroi agresorin si një student të shkëlqyer pa precedentë penalë para këtyre ngjarjeve, por nuk dha asnjë informacion tjetër.
Personi i armatosur pësoi “lëndime “, por nuk ishte e qartë nëse ai vrau veten apo u qëllua për vdekje nga ndonjë shkëmbim zjarri me oficerët, tha Vondrasek, duke shtuar se “nuk ka asnjë provë se ai mund të kishte bashkëpunëtor”.
Agresori zotëronte ligjërisht disa armë – policia tha se ai ishte i armatosur rëndë të enjten dhe mbante shumë municione – dhe se ajo që bëri ishte “e menduar mirë, ishte një akt i tmerrshëm”, tha Vondrasek.
Autoritetet e universitetit thanë se do të forcojnë sigurinë në ndërtesat universitare me efekt të menjëhershëm.
“Ne vajtojmë humbjen e jetës së anëtarëve të komunitetit tonë universitar, shprehim ngushëllimet tona më të thella për të gjithë të vdekurit dhe mendimet tona shkojnë për të gjithë ata që u prekën nga tragjedia”, tha Universiteti Charles në një deklaratë.
Qeveria u përpoq shpejt të shuante shqetësimet se masakra ishte kryer nga interesa të huaja.
“Nuk ka asnjë indikacion që ka të bëjë me terrorizmin ndërkombëtar,” tha Rakusan.
“Është një krim i tmerrshëm, diçka që Republika Çeke nuk e ka përjetuar kurrë,” tha ai.
Pavel Nedoma, drejtori i Galerisë Rudolfinum gjendur pranë vendngjarjes, tha se ai pa nga një dritare teksa një person qëndronte në një ballkon të ndërtesës qëlloi me armë.
Autoritetet evakuuan të gjithë personelin nga ndërtesa dhe policia tha se ishte ende në kontroll të zonës, përfshirë ballkonin, për eksplozivë.
Presidenti Petr Pavel tha se ishte “i tronditur” nga ajo që ndodhi dhe ofroi ngushëllimet e tij për të afërmit e viktimave, si dhe reaguan po ashtu edhe liderët e Gjermanisë, Francës dhe Sllovakisë, Bashkimit Evropian e Izraelit.
Sekretarja e shtypit e Shtëpisë së Bardhë Karine Jean-Pierre dërgoi një mesazh ngushëllimi.
“Presidenti dhe zonja e parë po luten për familjet që humbën të dashurit dhe të gjithë të tjerët që janë prekur nga ky akt i pakuptimtë dhune”, tha Jean-Pierre. “Në emër të Shteteve të Bashkuara, ne dërgojmë ngushëllimet tona dhe gjithashtu u urojmë shërim të shpejtë të mbijetuarve të kësaj ngjarje tragjike”.
Qeveria çeke shpalli të shtunën një ditë zie kombëtare për të nderuar viktimat, tha kryeministri Petr Fiala.
Më parë, ngjarja më e rëndë tragjike që ka parë Republika Çeke ndodhi në vitin 2015, kur një person i armatosur hapi zjarr në qytetin juglindor të Uhersky Brod, duke vrarë tetë persona para se të qëllonte për vdekje veten. Përgatiti: /Liberale.al/
