Një takim i frytshëm është konsideruar ai mes Giorgia Melonit dhe presidentit serb Aleksandar Vuçiç në Beograd. Vetë kryeministrja e Italisë e pranoi kur tha: “Jam e sigurt se nga kjo vizitë e parë në Serbi si kryeministre, marrëdhëniet tashmë të rëndësishme dhe domethënëse mes dy vendeve do të mund të forcohen edhe më shumë”.
Vuçiç ndau të njëjtin mendim, i cili i përkufizoi “Serbinë dhe Italinë si dy vende mike me marrëdhënie të shkëlqyera politike dhe ekonomike”.
Meloni e Vuçiç diskutuan “për të gjitha temat e rëndësishme rreth vendeve të tyre”. Në veçanti, tregtia serbe me Italinë arriti në 4.6 miliardë euro dhe për të cilën presidenti serb shpresonte se “mund të arrijë një nivel më të lartë në të ardhmen”.
“Serbia i është mirënjohëse Italisë për mbështetjen thelbësore të treguar në rrugën evropiane të ndërmarrë nga Beogradi. Meloni ka dashur gjithmonë të dëgjojë mendimin tonë, atë se çfarë kishte për të thënë Serbia”. Kryeministrja italiane shkon edhe më tej kur thotë se “Evropa nuk do të jetë në gjendje ta quajë veten të bashkuar derisa Ballkani Perëndimor të ketë përfunduar hyrjen: integrimi është thelbësor për të garantuar sigurinë dhe rritjen ekonomike. Italia është ndër mbështetësit kryesorë të ribashkimit të Evropës. “
“Serbia – vazhdon ajo – po jep kontributin e saj, jam e sigurt se do të vazhdojë të ketë një qasje konstruktive në dialogun e lehtësuar nga Bashkimi Evropian me Kosovën. Ne besojmë se duhet të punojmë për zbatimin e plotë dhe të shpejtë të angazhimeve të marra nga palët, me marrëveshjet që tashmë janë arritur, por ka shumë çështje të tjera për të cilat mendojmë se mund të bashkëpunojnë njerëz seriozë, pragmatikë”. /Liberale.al/
