Pas 53 ditësh protestash të përditshme para Kryeministrisë, lëvizja qytetare kundër qeverisë do ta zhvendosë këtë të enjte aksionin përpara godinës së Kuvendit, në ditën kur do të zhvillohet seanca e fundit plenare e këtij sesioni parlamentar.
Prej disa ditësh, organizatorët u kanë bërë thirrje qytetarëve që të mblidhen në orën 08:30, një orë e gjysmë përpara nisjes së seancës plenare të parashikuar për në 10:00, me synimin për të bllokuar hyrjen e deputetëve në Parlament.
Në thirrjet e shpërndara në rrjetet sociale, protestuesve u është kërkuar të paraqiten të pajisur me vezë, domate dhe miell, për t’i përdorur si formë simbolike proteste ndaj mazhorancës.
Për shkak të paralajmërimeve për një pjesëmarrje të lartë dhe mundësisë së incidenteve, Policia e Shtetit ka kaluar në gatishmëri të shtuar. Sipas burimeve, rreth 1.200 efektivë policie do të angazhohen për sigurinë e godinës së Kuvendit dhe të institucioneve përreth.
Masat e sigurisë kanë nisur që këtë të mërkurë, kur përpara godinës së Kuvendit dhe në rrugët përreth janë vendosur kordonë metalikë, ndërsa perimetri i Parlamentit do të ruhet nga forca të shumta policore gjatë gjithë zhvillimit të protestës dhe seancës plenare.
Kjo nuk është hera e parë që protesta zhvendoset para Kuvendit. Më 2 korrik, një tubim i ngjashëm u shoqërua me përplasje mes protestuesve dhe forcave të policisë, ndërsa pas incidenteve u arrestuan 19 persona.
Organizatorët kanë bërë të qartë se aksioni i së enjtes synon të ushtrojë presion mbi deputetët në ditën e fundit të punimeve të Kuvendit për këtë sesion parlamentar, ndërsa kërkesat e protestës mbeten të pandryshuara: dorëheqja e kryeministrit Edi Rama, largimi i qeverisë, shfuqizimi i ligjit për investitorët strategjikë, anulimi i “Paketës së Maleve”, si dhe ndryshimet në ligjin për zonat e mbrojtura dhe atë për trashëgiminë kulturore.