Në Kodin e ri Penal, dënimet për lëndët narkotike janë parashikuar, por për avokatin Ervin Karanxha ka disa pika që duhen sqaruar. Së pari, shprehet ai në “Aldo Morning Show” në Tv Klan, është një çështje që duhet rishikuar me grupet e interesit. Avokati aprovon ndarjen në tri kategori, por nenet për secilën duhen qartësuar.
Avokati është i mendimit se hashashi për përdorim vetjak (30 gramë ose më pak), s’duhet të përbëjë kundravajtje penale. Nga ana tjetër, për drogat si kokaina apo heroina, duhet bërë ndarja e lëndës së pastër nga përzierja dhe kundravajtësi duhet të dënohet për sasinë e pastër.
Ervin Karanxha: Mendoj, për hashashin, mbajtja e një sasie 30 gramë e poshtë nuk duhet të përbëjë vepër penale për përdoruesit, jo shitjen. E dyta, duhet që për çdo nen, qoftë te heroina, qoftë te drogat e tjera, te kokaina ose te hashashi, duhet bërë ekspertimi sasior dhe cilësor.
Aldo: Më fal, nëse unë mbaj 30 gramë për përdorim vetjak, ti po më ligjëron drogën mua?
Ervin Karanxha: Edhe sot që ne flasim, droga është e ligjëruar, për përdorim vetjak nuk dënohet. Ne dënojmë shitësit.
Aldo: Nëse unë kam 7 doza, nga 30 bëjnë 210. E kam për përdorim vetjak. Pra, dënohem unë?
Ervin Karanxha: Sot me Kodin Penal aktual dënohesh sepse thotë duhet të kesh një dozë në atë moment, por personi e merr për gjithë muajin aty. Nëse ti do të dalësh të blesh ditë për ditë, ti more atë që more. Te droga duhet bërë edhe ekspertimi sasior, çfarë do të thotë? Mund të ndodhë, se edhe te shitësit e drogës ke mashtruesë, mund të jetë 1 gram e pastër, ke allçi dhe ti dënohesh për allçinë. Pra, duhet akti të ndajë sa është drogë e pastër. Edhe në vendet perëndimore në dijeninë time, aty bëhet ekspertimi, janë 6 kile drogë, sa është e pastër dhe ti do të mbash përgjegjësi për të pastrën, jo për përzierjen. Ka ndodhur shpesh, edhe te heroina, mashtruesit kanë shitur kafe, e kanë bluar kafen dhe e kanë shitur. Ne do të heqim kafen dhe personi do të dënohet për atë që ka bërë. Sot ke shumë të pafajshëm në burg sepse s’e kanë bërë.