Dhjetëra mijëra njerëz kanë marshuar në qytete të ndryshme të Europës duke denoncuar luftën izraelite në Gaza dhe duke kërkuar reagim më të fortë ndërkombëtar ndaj shkeljeve të vazhdueshme të armëpushimit të ndërmjetësuar nga SHBA-të.
Protestat, të zhvilluara të shtunën, 29 nëntor, me rastin e Ditës Ndërkombëtare të Solidaritetit me Popullin Palestinez, vijnë ndërsa numri i viktimave në Gaza i ka kaluar 70 mijë. Ndër të fundit viktima, janë dy djem të moshave 8 dhe 10 vjeç, të vrarë në një sulm me dron në Bani Suheila, në jug të Rripit të Gazës.
Protesta masive në Paris
Në Paris, rreth 50 mijë persona marshuan në rrugët kryesore të qytetit duke brohoritur “Gaza, Gaza, Parisi është me ju” dhe “Nga Parisi në Gaza, rezistencë!”.
Demonstruesit valëvitën flamuj palestinezë dhe dënuan “gjenocidin izraelit”.
“Është e patolerueshme. Jemi ende shumë larg drejtësisë”, tha një protestues. Një tjetër shtoi:
Ne e dimë që kjo është e gabuar. Pse ata që janë në pushtet nuk e shohin njësoj?
Anne Tuaillon, drejtuese e Shoqatës “France Palestine Solidarité”, tha se 7 javë pas hyrjes në fuqi të armëpushimit, “asgjë nuk është zgjidhur”. Sipas saj, “armëpushimi është thjesht një perde tymi”, ndërsa Izraeli vazhdon shkeljet dhe ndalon ndihmat humanitare.
Marshime edhe në Londër, Gjenevë, Romë e Lisbonë
Në Londër, organizatorët thanë se deri në 100 mijë persona morën pjesë në marshim, duke kërkuar llogaridhënie për “krimet” ndaj palestinezëve dhe mbrojtje për civilët që vazhdojnë të vuajnë edhe gjatë armëpushimit.
Në Romë, mes protestuesve ishin edhe raportuesja speciale e OKB-së për territoret e pushtuara, Francesca Albanese, dhe aktivistja Greta Thunberg. Mësohet se kanë marrë pjesë rreth 100 mijë persona.
Albanese shkroi në “X” se Izraeli po kryen “gjenocid” ndaj palestinezëve, si në Gaza ashtu edhe në Bregun Perëndimor, duke e përshkruar situatën si “spastrim i planifikuar etnik”.
Shkeljet e armëpushimit vazhdojnë
Sipas raportimeve, Izraeli është tërhequr deri në një “vijë të verdhë” brenda Gazës, por vazhdon të kontrollojë më shumë se gjysmën e territorit dhe ka kryer disa sulme vdekjeprurëse që shkelin marrëveshjen. Që nga hyrja në fuqi e armëpushimit, janë regjistruar të paktën 500 shkelje nga ana e Izraelit, me 347 palestinezë të vrarë dhe 889 të plagosur.
Dy vëllezërit Fadi dhe Jumaa Tamer Abu Assi, 8 dhe 10 vjeç, u vranë ndërsa mblidhnin dru për babanë e tyre me aftësi të kufizuara.
“I gjetëm copa-copa”, tha xhaxhai i tyre për AFP.
“Një luftë për mbijetesë”
Sekretari i Përgjithshëm i OKB-së, Antonio Guterres, tha se “vrasja e civilëve, zhvendosja e një popullsie të tërë dhe bllokimi i ndihmave humanitare janë të papranueshme”.
Nga Gaza, reporterja e Al Jazeera-s, Hind Khoudary, thotë se palestinezët “thjesht po përpiqen të mbijetojnë”.
“Shumë njerëz ende flenë në çadra, pa ushqim, pa ilaçe dhe pa shkollë për fëmijët. Edhe me armëpushim, njerëzit po vdesin ngadalë”, raporton ajo.
Amnesty International paralajmëroi të enjten, 27 nëntor, se autoritetet izraelite “ende po kryejnë gjenocid në Gaza”, duke sulmuar zona të reja dhe duke kufizuar ndihmat kritike.