Pas një pushimi 53-ditor, anëtarët e Dhomës së Përfaqësuesve u rikthyen të martën në Uashington, për një votim vendimtar që mund t’i japë fund mbylljes më të gjatë të qeverisë amerikane në histori.
Situata e transportit ajror në vend ishte e tensionuar, me rreth 1,200 fluturime të anuluara për shkak të mbylljes së zgjatur. Për pasojë, disa ligjvënës zgjodhën mënyra alternative udhëtimi për të mbërritur në Kapitol.
Përfaqësuesit republikanë Rick Crawford nga Arkansasi dhe Trent Kelly nga Misisipi udhëtuan së bashku me makinë, ndërsa kolegu i tyre Derrick Van Orden njoftoi në rrjete sociale se po bënte udhëtimin 16-orësh nga Wisconsin me motoçikletë.
“Do të jetë pak ftohtë, por unë do të bëj detyrën time,” tha ai në një video të publikuar në mediat sociale.
Dhoma e Përfaqësuesve, e kontrolluar nga republikanët, pritet të votojë të mërkurën pasdite për një kompromis që do të rikthente fondet për agjencitë federale dhe do t’i jepte fund mbylljes që ka hyrë në ditën e saj të 42-të, që nga 1 tetori.
Senati, gjithashtu nën kontrollin republikan, e miratoi marrëveshjen të hënën në mbrëmje, dhe Kryetari i Dhomës së Përfaqësuesve, Mike Johnson, tha se pret që ajo të kalojë pa pengesa edhe në dhomën e tij.
Pas miratimit nga Kongresi, Presidenti Donald Trump pritet ta nënshkruajë ligjin.
“Po e hapim vendin tonë. Nuk duhej të ishte mbyllur kurrë,” tha ai gjatë një aktiviteti për Ditën e Veteranëve në Arlington, Virxhinia.