Është mbyllur me sukses këtë të diel Panairi i 26-të i Librit në Tiranë i cili qëndroi i hapur për pesë ditë me radhë për dashamirësit e librit.
Në Tiranë 95 shtëpi botuese dhe dhjetëra autorë dhe përkthyes nga rajoni morën pjesë në Panairin e 26-të Librit. Takimi vjetor vlerësohet si një nga ngjarjet më të rëndësishme të kulturës dhe librit shqip. Nisur nga suksesi i këtij viti botuesit thanë se kanë nevojë për më shumë mbështetje për zhvillimin e kulturës kombëtare.
Burime nga shtëpia botuese “UET PRESS” i thanë “Liberale.al” se panairi i këtij viti për të gjithë pjesëmarrësit shënoi një sukses të jashtëzakonshëm. Pas një tkurrjeje që pati vitet e fundit, duket se dalja nga pandemia, por edhe rikthimi i të rinjve dhe qytetarëve te libri, solli pjesëmarrje dhe shitje rekord të librave në panairin e këtij viti.
“UET PRESS” përmendi tre nga librat më të suksesshëm të saj si shtëpi botuese, por edhe të mbarë panairit.
Sukses shënoi libri më i fundit i gazetarit dhe drejtuesit të emisionit Opinion, Blendi Fevziut dhe “UET PRESS” titulluar “Takimet e mia me…” në të cilin përfshihen portretet e 39 personazheve të rëndësishme të historisë shqiptare. Në pesë ditët e panairit libri i Fevziut shiti 2 mijë kopjet e para.
Gjithçka e përmbledhur shkurt, në mënyrë mjeshtërore dhe lehtësisht të lexueshme nga të gjithë kureshtarët e historisë së Shqipërisë.
Libri sjell dëshmi historije për personalitetet më të shquara të cilët dominuan jetën politike të vendit, në 100 vitet e fundit. Përzgjedhja e portreteve të 39 personazheve është bërë nga puna e autorit, i cili i ka mundur t’i njohë ata nga afër dhe t’i intervistojë gjatë karrierës së tij 35-vjeçare.
Duke shkruar jetët e panjohura të Ismail Qemalit, Faik Konicës, Esat Toptanit dhe tani në fund edhe të Fan Nolit, Ilir Ikonomi ka sjellë histori fantastike të cilat kanë mgjallur interes të menjëhershëm për lexuesin. “Apostulli” i Ilir Ikonomit shiti mbi 1 mijë kopje në panair, duke shitur të gjitha kopjet që të shtunën paradite. Paanshmëria, profesonalizmi, larg pasioneve dhe në luftë me subjektivizmin. Ishin këto tipare dalluese të librin “Apostulli”, i pari nga tre vëllimet kushtuar biografisë së Fan Nolit, i gazetarit Ilir Ikonomi, i cili këshilloi studiuesit shqiptarë që të marrin në konsideratë stilin amerikan të të shkruarit të historive dhe t’i lejojnë lexuesit t’i krijojnë vetëgjykimet përballë fakteve që ata mund të servirin. Ilir Ikonomi në vëllimin e parë me 430 faqe, botim i UET PRESS, shënoi një tjetër sukses në panair me Nolin e madh.
“Nata”, romani më i ri i shkrimtarit të mirënjohur Preç Zogaj, i cili përmes fateve tragjike të personazheve të tij, në ngjarje që zhvillohen në periferi të Tiranës, në fillimin e viteve 2000, sjell për lexuesit realitetin letrar të tranzicionit shqiptar. Në pak ditë gjatë panairit romani shiti mbi 500 kopje. Romani siç dihet është një zhanër më i vështirë për t’u përqafuar shpejt në kohë nga lexuesi i gjerë ndaj edhe “Nata” konsiderohet një tjetër sukses i madh i shtëpisë botuese UET PRESS në veçanti dhe i librit në përgjithësi. Teksa që në fillim pas daljes në treg vlerësimet ishin të shumta dhe interesimi ka qenë i madh, edhe suksesi i romanit “Nata” është garantuar.
