Ka përfunduar afati i aplikimeve për postin e Prokurorit të Përgjithshëm, ndërsa në garë janë regjistruar pesë kandidatë, të cilët synojnë drejtimin e institucionit më të lartë të akuzës në vend.
Këshilli i Lartë i Prokurorisë (KLP) ka bërë publike listën zyrtare të kandidatëve që kanë dorëzuar dokumentacionin brenda afatit të përcaktuar.
Në listë bëjnë pjesë prokurori i Prokurorisë së Posaçme (SPAK), Adnan Xholi, ish-Prokurorja e Përgjithshme Arta Marku, si dhe Fatjona Memçaj, Rovena Zoto dhe Ylli Pjetërnikaj.
Pas përfundimit të fazës së aplikimeve, kandidatët do t’i nënshtrohen procesit të verifikimit dhe vlerësimit nga KLP, në përputhje me kriteret dhe procedurat e parashikuara për këtë funksion të lartë në sistemin e drejtësisë.
Prokurori i Përgjithshëm zgjidhet për mandatin e përcaktuar me ligj dhe ka përgjegjësinë për drejtimin, koordinimin dhe mbikëqyrjen e veprimtarisë së prokurorive në të gjithë vendin.
