Kryeministri i Pakistanit, Shehbaz Sharif, ka mirëpritur njoftimin për një marrëveshje që parashikon çarmatimin e Hamasit, duke e cilësuar atë si një hap të rëndësishëm drejt paqes në Lindjen e Mesme. Në një postim në platformën X, Sharif shkroi se vendet ndërmjetësuese meritojnë vlerësim të veçantë.
“Vendet ndërmjetësuese, përfshirë Shtetet e Bashkuara të Amerikës, Egjiptin, Katarin dhe Turqinë, meritojnë vlerësim të veçantë për përpjekjet e tyre në arritjen e këtij progresi,” deklaroi ai.
Kryeministri pakistanez theksoi rolin e Presidentit të SHBA-së, Donald Trump, duke thënë se udhëheqja e tij ka luajtur rol kyç.
“Nën udhëheqjen e guximshme të Presidentit Trump, kjo përfaqëson një arritje të rëndësishme për Bordin e Paqes”, shtoi ai.
Pakistani ka luajtur një rol kyç edhe në negociatat mes Shteteve të Bashkuara dhe Iranit, ku bisedimet u mbajtën në Islamabad gjatë muajit prill.
Në vazhdim të deklaratës së tij, Sharif shprehu shpresën se këto zhvillime do të sjellin hapa konkretë.
“Pakistani shpreh shpresën se me këto zhvillime, do të ndërmerren hapa konkretë drejt zbatimit të të gjitha angazhimeve sipas Planit të Paqes në Gaza,” tha ai teksa shtoi se shpreson që këto përparime të çojnë drejt vetëvendosjes së popullit palestinez.
