Liderja e së djathtës franceze, Marine Le Pen, konfirmoi mbrëmjen e së martës se do të kandidojë në zgjedhjet presidenciale të Francës në vitin 2027. Njoftimi u bë gjatë një interviste për televizionin francez TF1, vetëm pak orë pasi Gjykata e Apelit në Paris vendosi ta shpallë fajtore për përvetësim të fondeve të Parlamentit Evropian, por njëkohësisht i hapi rrugën për të marrë pjesë në garën për Pallatin Élysée.
Kjo ishte deklarata e saj e parë publike pas vendimit të gjykatës, i cili ndryshoi ndjeshëm dënimin e dhënë në shkallën e parë. Edhe pse fajësia e Le Pen u konfirmua, gjykata zbuti masën që i ndalonte ushtrimin e funksioneve publike, duke i mundësuar asaj të rikthehet në garën presidenciale.
Me këtë vendim, Marine Le Pen do të ketë mundësinë të kandidojë për herë të katërt për postin e presidentes së Francës, pas përpjekjeve të viteve 2012, 2017 dhe 2022. Sipas sondazheve të fundit, ajo dhe partia e saj Tubimi Kombëtar (Rassemblement National) konsiderohen ndër favoritët për të fituar raundin e parë të zgjedhjeve presidenciale të vitit 2027.
Megjithatë, çështja gjyqësore nuk ka marrë fund. Le Pen deklaroi se do të apelojë vendimin, me synimin që të shmangë detyrimin për të vuajtur një vit arrest shtëpiak me mbikëqyrje përmes një byzylyku elektronik, dënim që shoqëron vendimin e gjykatës.
Ajo theksoi se dëshiron të zhvillojë fushatën elektorale pa kufizime, duke argumentuar se një kandidat për president duhet të ketë liri të plotë lëvizjeje për të takuar qytetarët në të gjithë vendin.”Gëzohem që gjykata i dha popullit francez lirinë për të votuar“, deklaroi Le Pen gjatë intervistës, duke shtuar se “populli francez do ta thotë fjalën e fundit“.
Vendimi i Gjykatës së Apelit vjen pas muajsh pasigurie politike për të ardhmen e lideres së së djathtës franceze. Në vendimin e mëparshëm të shkallës së parë, ndalimi për të kandiduar në poste publike rrezikonte ta përjashtonte nga zgjedhjet presidenciale të vitit 2027. Megjithatë, pas zbutjes së dënimit, pengesa ligjore që e ndalonte të kandidonte është hequr.
Rasti lidhet me akuzat për përdorimin e paligjshëm të fondeve të Parlamentit Evropian, të destinuara për asistentët parlamentarë, të cilët, sipas prokurorisë dhe gjykatës, në praktikë punonin për aktivitetet e partisë së saj në Francë dhe jo për institucionet evropiane.
Pavarësisht procedurave gjyqësore, Le Pen mbetet figura më e rëndësishme e së djathtës nacionaliste franceze. Konfirmimi i kandidaturës së saj pritet të ndikojë ndjeshëm në garën presidenciale të vitit 2027, e cila konsiderohet një nga sfidat politike më të rëndësishme për Francën pas përfundimit të mandatit të Emmanuel Macron.
