Rektori i Universitetit të Mjekësisë Xheladin Draçini, i njohur si Tano Karidi i Mjekësisë, për të cilin po përgatitet një kallëzim penal në SPAK, u është rikthyer metodave dhe kombinacioneve të kohërave kur dyshohet se ka qenë spiun i ish Sigurimit të Shtetit dhe SHIK-ut të Bashkim Gazidedes, për të goditur ‘armiqtë e brendshëm’. Në shenjestër të Draçinit është ish-dekania e Fakultetit të Mjekësisë, Edit Xhajanka, e cila konsiderohet e dyshimtë dhe armike nga Tano Karidi i Mjekësisë, pasi Xhajanka ka denoncuar me prova dhe fakte aferat korruptive në Fakultetin e Mjekësisë.
Pas bllokimit të planit nga ILDKPKI për të shkarkuar Prof. Dr. Edit Xhajankën përmes një kërkese të paraqitur nga dekania e Fakultetit të Mjekësisë Dentare, Silvana Bara, Xheladin Draçini, duke përdorur si gjithnjë Silvana Barën, u ka sajuar një letër anonime, për të inicuar një tjetër proces për shkarkimin e Edit Xhajankës, aktualisht përgjegjëse e Departamentit të Ortopedisë Stomatologjike. Letra anonime mësohet se është sajuar nga Draçini, i cili ia ka dhënë Silvana Barës, të cilën Tano Karidi po e përdor për hakmarrje ndaj Edit Xhajankës.
Përmbajtja e letrës anonime është sa banale, groteske aq edhe e pabesueshme. “Në Rektoratin e UMT, në datën 14.07.2026, (protokolluar me tonin nr. 1791 prot.), është depozituar një kërkesë nga një grup pedagogësh nga Fakulteti i Mjekësisë Dentare/UMT, pa u bërë i ditur identiteti i tyre. Kjo letër ka për objekt kërkesën për nisjen e procedurës së verifikimit të ligjshmërisë së fitimit të titullit akademik “Profesor” nga shtetasja Edit Xhajanka dhe konstatimit të shkeljeve ligjore ose etikës akademike dhe marrjes së masave përkatëse sipas legjislacionit në fuqi“, thuhet në letrën anonime.
(Silvana Bara)
Përmes Silvana Bara, Tano Karidi i Mjekësisë është përfshirë në disa projekte fiktive dhe korruptive me grupin kriminal të AKSHI-t. Silvana Bara është e bija e Petrit Bara, ish kandidat për deputet i LSI-së së Ilir Metës, aktualisht rektori i Universitetit “Luarasit” të Irfan Hysenbelliut, i cili ka zaptuar pasurinë publike ish konvikti i Gjuhëve të Huaja, duke e kthyer në biznes privat.
Petrit Bara, ish dekan i Fakultetit të Infermierisë është i skeduar si lidhje e dy simboleve të korrupsionit në drejtësi dhe politikë, respektivisht i ish kryeprokurorit të Tiranës Petrit Fusha, i pandehur për fshehje pasurie dhe i dyshuar për pastrim parash, si dhe i Ilir Metës, në burg për korrupsion dhe pastrim parash. Karriera e znj. Silvana Bara është produkt i dorës Petrit Bara, falë lidhjeve të tij të errëta me linja korrupsioni në drejtësi dhe politikë.
Xheladin Draçini drejt SPAK-ut, KLSH zbulon afera korruptive dhe shkelje të rënda
Rektori i Universitetit të Mjekësisë Xheladin Draçini, i njohur si Tano Karidi i Mjekësisë, dhe grupi i tij pritet të përfundojnë të kallëzuar në SPAK për një sagë aferash korruptive me fondet e universitetit, për marrëveshje korruptive, manipulim të procedurave tenderuese dhe një sërë shkeljesh me pasoja financiare. Konstatimet janë bërë nga Kontrollit i Lartë i Shtetit gjatë auditimit të aktivitetit financiar të Universitetit të Mjekësisë.
Sipas burimeve, grupi i adutimit të KLSH ka konstatuar devijime dhe shkelje të rënda nga kupola e mjekësisë në dosjet e veprimtarisë financiare, praktikave ligjore, trajtimin e studentëve, marrëveshjet, listpagesat, tenderat, vendimet e bordit, shpenzime të pajustifikuara, keqmenaxhimin e aseteve etj.
Përpos të tjerave KLSH ka konstatuar emërime jo në përputhje me ligjin, shkelje ligjore në vendimet e bordit, mungesën e auditimit të brendshëm, funksione të dyfishta të punonjësve të univeristetit, marrëveshje të pajustifikuara dhe me kosto financiare që konsiderohen si dëm ekonomik, dështim në realizimin e shpenzimeve, kontrata qiraje abuzive, udhëzime të paligjshme të rektorit etj.
Raporti me konstatimet me natyrë penale është në tavolinën e Rektorit të Universitetit të Mjekësisë Xheladin Draçini. Për çdo konstatim të KLSH, shumë prej të cilave me natyrë penale, Xheladin Draçini ka të drejtë të bëjë prapësime dhe të japë versionin e tij, duke justifikuar kërdinë financiare dhe sagën e shkeljeve ligjore në funksion të dallavereve financiare. Duke marrë në shqyrtim prapësime me shpjegimet përkatëse, KLSH do të dalë me një raport përfundimtar për veprimtarinë e Universitetit të Mjekësisë.
Ndëkaq, duke iu referuar shkeljeve me natyrë penale, për Xheladin Draçinin dhe grupin e tij do të përgatitet një dosje penale, e cila do të referohet në SPAK. Ka dyshime të forta për ekszistencën e një grupi kriminal në Universitetin e Mjekësisë, me në krye Xheladin Draçinin me veprimtari në fushën e manipulimit të tenderave, korrupsionit dhe pastrimit të parave.