Marco Alberti është ambasadori i ri italian në Tiranë. Emërimi i tij u bë publik një ditë më parë nga Ministria e Jashtme Italiane, ndërsa zëvendëson në këtë detyrë Fabrizio Buccin i cili shkon në Gjermani.
53-vjeçari do të ketë një rol delikat, duke pasur parasysh marrëdhëniet gjithnjë e më të ngushta midis qeverisë italiane, të drejtuar nga kryeministrja Giorgia Meloni, dhe asaj shqiptare, të kryesuar nga kryeministri Edi Rama.
Kush është Marco Alberti?
Alberti ka lindur në vitin 1972 në Bukavu, në Zaire, shtet që sot njihet si Republika Demokratike e Kongos. Ai është diplomuar në Universitetin e Bolonjës për Juridik dhe ka nisur karrierën e tij diplomatike në vitin 2000, duke mbajtur disa pozita në Itali dhe jashtë vendit.
Që nga viti 2001 ka qenë pjesë e sekretariatit të Nënsekretarit të Ministrisë së Punëve të Jashtme. Nga viti 2003 deri në 2008, ka shërbyer si Sekretar i Dytë dhe më pas Sekretar i Parë në Buenos Aires, Argjentinë.
Më pas, ka qenë Konsull i Shtuar në Konsullatën e Përgjithshme të New York-ut dhe në vitin 2011 kaloi në Shërbimin e Shtypit dhe Komunikimit Institucional të Ministrisë së Punëve të Jashtme.