Kryebashkiaku i Kuçovës Kreshnik Hajdari është paraqitur sot në SPAK i shoqëruar edhe nga avokati Theodhori Sollaku.
Ndaj tij vijon hetimi për falsifikim të formularit të dekriminalizimit pasi Hajdari nuk kishte dekluar në formularin e vetëdeklarimit, një dënim nga Gjykata e Janinës me masë qortuese për kalimin e paligjshëm të kufirit në Greqi, kur ishte i mitur.
Megjithatë një ditë më parë Komisioni Qendror vendosi të mos i heqë mandatin kryetarit të Bashkisë së Kuçovës. Kryekomisioneri Celibashi vlerësoi se nuk ka shkaqe ligjore që Hajdarit t’i ndërpritet mandati.
Drejtësia greke i përcolli pak ditë më parë ministrisë sonë të Drejtësisë, një vendim që faktonte se kryebashkiakut i Kuçovës, Kreshnik Hajdari është dënuar nga gjykata e Janinës, ndërkohë që në formularin e vetëdeklarimit ka thënë se nuk është i dënuar.
Gjykata në Janinë e ka gjetur fajtor Hajdarin për hyrje në territorin grek në mënyrë të paligjshme dhe e ka dënuar në 23 qershor të vitit 1999 me “masë riedukuese të qortimit”, pasi në atë vit, kryebashkiaku i zgjedhur ka qenë vetëm 17 vjeç.
