Një telefonatë e papritur nga drejtori i përgjithshëm i RTSH-së, Alfred Peza, e hutoi. Ishte në ambientet e televizionit, duke u përgatitur për emisionin e saj “Stacioni Rozë”, një projekt që qëndronte në sirtar prej kohësh, por që RTSH ia mundësoi në fillim të këtij sezoni televiziv.
Në zyrë e priste Peza dhe drejtori artistik i Festivalit të RTSH-së, Boiken Lako. Ata i komunikuan se ishte përzgjedhur për të qenë prezantuese e festivalit, përkrah emrave të njohur të balerinit Kledi Kadiu dhe aktores Adriana Matoshi, me bashkëprezantues Xhuliano Dule.
Gjëja e parë që i erdhi në mendje ishte: “Është momenti im dhe do ta shfrytëzoj”. Të qenët prezantuese e festivalit më të rëndësishëm në Shqipëri, është një ngjarje e madhe. Është ëndrra e çdo moderatori që aspiron rritje dhe jetëgjatësi në ekran. Për Krisën ishte një kapërcim galopant, sigurisht edhe një privilegj siç e cilëson ajo. E kishte çuar ndër mend të ishte në atë skenë, por jo kaq shpejt. Ndoshta në një të ardhme të largët, pasi të bënte disa vite karrierë.
“Programi që kam më përmbush sepse e kam menduar dhe idealizuar prej kohësh. Tani kisha planifikuar vetëm intervista me artistë dhe të rritesha brenda tij”, thotë Krisa, duke shtuar se është kërkuese ndaj vetes dhe dëshiron të bëjë më shumë për të realizuar qëllimet e saj.
“Një mundësi shumë e madhe që do të më ndihmojë në karrierë”, thotë ajo. E emocionuar nga lajmi pas daljes nga zyra, menjëherë mori në telefon regjisoren e emisionit dhe më pas mamin. Tregon se e motra nuk ishte aspak e befasuar nga lajmi. Ishte e sigurt që do t’i vinte një sfidë e tillë.
Suksesi i Krisa Caushit në skenë ishte projektuar prej kohësh. Familja e kishte mbështetur në rrugëtimin dhe ëndrrën e saj, pasi spikaste gjithmonë me zhdërvjelltësinë. Edhe formimin akademik e orientoi drejt gazetarisë. Studimet bachelor i mbylli me sukses në Universitetin Europian të Tiranës, për degën Komunikim, në profilin Gazetari. Gjatë kohës së studimeve ajo ka qenë pjesë e Këshillit Studentor.
Edhe pse ishte shprehur se nuk priste të ishte perfekte, prej tri ditësh ajo shkëlqeu në skenën e Pallatit të Kongreseve, me lirshmërinë dhe frymën rinore. Ashtu siç kishte treguar për publikun, veshjet e saj spikatën, duke sjellë në to elementë të ajrit, ujit, tokës dhe zjarrit. Këtë të premte ajo ngjitet në skenë për natën finale të “Fest 62”, duke përmbyllur kështu një ëndërr.
Nata më speciale ishte nata e tretë, ku Krisa u surprizua në skenë nga dy prezantuesit e tjerë, orkestra dhe publiku, të cilët e uruan në kor për ditëlindjen. “Ditëlindja më e bukur e jetës sime dhe nuk kam për ta harruar kurrë”, u shpreh ajo mes emocionesh.
Krisa Caushi, një yll në ngjitje që i duhet skenës dhe publikut shqiptar, qëndron fort me këmbë në tokë. Edhe pse ndihet e plotësuar, ajo nuk i trembet asgjëje, mirëpret çdo sfidë që ia dëshiron zemra./Liberale.al
