Rregullatori i medias dhe telekomunikacionit në Korenë e Jugut ka urdhëruar kompanitë amerikane Google dhe Apple të paguajnë gjithsej 63.7 miliardë won, rreth 42.7 milionë euro, për shkelje të rregullave të konkurrencës në dyqanet e aplikacioneve.
Komisioni Korean i Medias dhe Komunikimit (KMCC) vendosi një gjobë prej 42.9 miliardë wonësh, rreth 28.7 milionë euro, për Google dhe 20.8 miliardë wonësh, rreth 13.9 milionë euro, për Apple, pas një hetimi që nisi në gusht të vitit 2022.
Sipas autoritetit, të dyja kompanitë kanë shfrytëzuar kontrollin mbi dyqanet e tyre të aplikacioneve për t’i orientuar zhvilluesit drejt sistemeve të tyre të pagesave, si dhe për të kufizuar shqyrtimin e aplikacioneve.
Hetimi zbuloi shkelje të një ligji të miratuar në vitin 2021, i cili ndalon operatorët e dyqaneve të aplikacioneve të detyrojnë zhvilluesit të përdorin një sistem të caktuar pagese. Koreja e Jugut ishte vendi i parë në botë që miratoi një ligj të tillë.
Edhe pse Google dhe Apple lejuan zyrtarisht përdorimin e sistemeve alternative të pagesave brenda aplikacioneve, ato aplikuan komisione prej 26% për këto transaksione, krahasuar me tarifën prej 30% për sistemet e tyre. Sipas komisionit, kjo praktikë kufizoi ndjeshëm alternativat reale për zhvilluesit.
Vendimi i autoriteteve koreano-jugore vjen në një kohë kur të dyja kompanitë po përballen me masa të ngjashme rregullatore edhe në juridiksione të tjera, përfshirë Bashkimin Evropian, për shkak të praktikave të tyre në tregun e aplikacioneve dhe pagesave dixhitale.
The post Koreja e Jugut gjobit Google dhe Apple me 42.7 milionë euro appeared first on Euronews Albania.
Burimi: Botë