Bardhyl Kollçaku, Gjeneral Brigade në emisionin “Një Shqipëri” me Mentor Nazarkon teksa foli për Vehbije Kuti, Gjeneral Brigade e cila ishte po ashtu pjesë e emisionit përmendi dhe shifrat e femrave ne forcat mbrojtëse.
Ai tha se në forcat e armatosura janë 15 për qind ushtarake femra madje Shqipëria është ndër vendet me pjesëmarrjen më të lartë të grave në forcat e armatosura.
“Janë 36 vite punë dhe eksperiencë. Një karrierë e gjatë shumë e suksesshme duke kryer detyra nga më të ulëtat deri tek ajo që ka sot. Në forcat e armatosura janë 15 për qind ushtarake, femra, në detyra të ndryshme, duke përfshirë dhe stafin e Ministrisë së Mbrojtjes janë gati 20 për qind dhe kjo e rendit Shqipërinë ndër vendet me pjesëmarrjen më të lartë të grave në forcat e armatosura”, tha ai.
Sipas tij barrierat për të kryer detyrat në pozicione të ndryshme që kanë të bëjnë me forcat e armatosura, kanë rënë.
“Nuk është e lehtë, është sfiduese pasi duhet përgatitje e madhe. Unë kam konstatuar me kënaqësi se barrierat për të kryer detyrat kanë rënë dhe ato janë të gatshme të kryejnë të gjitha detyra dhe ndaj janë përfaqësuese në detyrat më të larta”, u shpreh Kollçaku.