Bashkia e Vlorës thotë se shpalli kompaninë “Asi-2A Co fituese të një tenderi 500 mijë euro për rikonstruksionin e shkollës 9-vjeçare “Avni Rustemi”, duke i toleruar disa devijime nga kriteret kualifikuese. “Devijimet u cilësuan të vogla dhe pa ndikim në zbatimin e kontratës. E shpallëm fitues, duke vlerësuar se operatori tjetër i kualifikuar kishte ofertë më të lartë”.
Argumenti, megjithëse jo shumë ligjor, mund të ishte i pranueshëm në aspektin ekonomik. Por, Kontrolli i Lartë i Shtetit konstatoi se për të njëjtat “devijime të vogla”, disa nga kompanitë pjesëmarrëse në garën e zhvilluar në vitin 2023 u skualifikuan.
Këtu, historia merr një rrjedhë tjetër. Ajo që dukej si një manovër e Bashkisë së drejtuar në atë kohë nga Ermal Dredha, mund të ishte një mekanizëm për të dorëzuar kontratën tek një kompani “e preferuar”.
Për momentin, nuk është e qartë nëse KLSH-ja ka dorëzuar kallëzim penal për “shkelje të barazisë në tendera”. Megjithatë, ajo që dihet deri më tani është fakti që kompania fituese e atij tenderi, “Asi-2A Co”, në pronësi të binjakëve Astrit dhe Andrea Gjikondaj, është përjashtuar për 12 muaj nga tenderat.
Në ditën e fundit të korrikut, Agjencia e Prokurimit Publik (APP) ka miratuar vendimin nr. 41, me objekt “Përjashtimin e subjektit Asi-2A Co për 12 muaj nga pjesëmarrja në tendera publikë, për arsye se ka keqinformuar për qëllime kualifikimi në tenderin me objekt ‘Rikonstruksioni i shkollës ‘Avni Rustemi”, Vlorë, me fond limit 53.389.166 lekë”.
Agjencia e Prokurimit Publik thotë se nisi hetimin administrativ për këtë rast, pas referimit të rastit nga Kontrolli i Lartë i Shtetit.
Tenderi “i kontestuar”
Në fillim të marsit 2023, Dritan Leli, në ditët e fundit të tij si kryebashkiak i Vlorës para dorëheqjes, ngriti grupin e punës që do të merrej me tenderin për rikonstruksionin e shkollës 9-vjeçare, “Avni Rustemi”.
Me largimin e tij, kjo procedurë, si edhe shumë punë të tjera të institucionit lokal, u vijuan nga Ermal Dredha, ish-ambasadori që u caktua nga kryeministri Edi Rama si njeriu që do të udhëhiqte bashkinë.
Tenderi u shpall në 6 nëntor 2023. Në përfundim të afatit të dorëzimit të ofertave, në 22 nëntor të atij viti, u paraqitën në garë 6 operatorë ekonomikë. Tre prej tyre u skualifikuan, për “mos plotësim të kritereve specifike”.
Në përfundim, fitues u shpall kompania “Asi-2A Co” e vëllezërve Gjikondaj, në bashkëpunim me “Viscons Group”, me ofertën ekonomikë 39.9 milionë lekë të reja.
Në vitin 2025, Kontrolli i Lartë i Shtetit zhvilloi një procedurë Auditimi Financiar në Bashkinë e Vlorës. Mes dokumentave të verifikuar ishte edhe procedura tenderuese për rikonstruksionin e shkollës “Avni Rustemi”.
Shkeljet e tenderit
Kontrolli i Lartë i Shtetit thotë se, nga verifikimi i dokumentacionit, rezulton se Komisioni i Vlerësimit të Ofertave, ka kryer veprime të pajustifikuara, duke krijuar disa situata faktike, të cilët u konkluduan me fitimin e tenderit nga bashkimi i operatorëve “Asi-2A Co” dhe “Viscons”.
Ndër shkeljet e konstatuara, KLSH ka theksuar sidomos njërën prej tyre.
Shoqëria “Asi-2A Co”, e cila drejtonte bashkimin e operatorëve fitues, kishte deklaruar se kishte në dispozicion për zbatimin e kontratës për rikonstruksionin e shkollës “Avni Rustemi” mjetet e nevojshme dhe drejtuesin teknik, të cilët do të angazhoheshin ekskluzivisht vetëm për këtë procedurë.
Por, siç konstatoi KLSH-ja, drejtuesi teknik dhe disa mjete ishin përfshirë në zbatimin e projekteve të tjera, të cilat nuk lejonin që të angazhoheshin në zbatimin e kontratës.
Sipas audituesve të Kontrollit të Lartë të Shtetit, kjo situatë e vendoste kompaninë në kushtet e “deklarimit të rremë” dhe që penalizohej nga neni 76 i Ligjit për Prokurimet Publike.
Pas këtij konstatimi, KLSH-ja kërkoi sqarime nga Bashkia e Vlorës. Institucioni vendor thotë në një përgjigje për audituesit shtetërorë se nuk shohin asnjë problem në këtë situatë.
“Në lidhje me konstatimin tuaj mbi kualifikimin e padrejtë të operatorin ekonomik të shpallur fitues, sqarojmë se, për të mos vijuar me operatorin e dytë, i cili ka një ofertë më të lartë, gjykuam se mangësitë e konstatuara mund të cilësoheshin si devijime të vogla pa ndikim në zbatimin e kontratës. Kështu në rastin e punëve të ngjashme që ka paraqitur me vlerë 1,5,96 mijë lekë më pak, kemi gjykuar se duke qenë se objekti dhe zërat e punimeve janë të ngjashëm, të mos përzgjidhet një OE me ofertë 2.9 milionë lekë”.
Argumenti i ofruar nga Bashkia e Vlorës nuk është marrë në konsideratë nga KLSH-ja, e cila ka referuar pranë Agjencisë së Prokurimit Publik rastin e shoqërisë ‘Asi-2A Co” për të marrë masat e nevojshme administrative për “deklarim të rremë”.
Mbi bazën e këtij informacioni, Agjencia e Prokurimit Publik kreu verifikimet e saj dhe vendosi që ta përjashtojë kompaninë e vëllezërve Gjikondaj për 1 vit nga pjesëmarrja në tendera publikë.