Kim Jong Un mbërriti këtë të martë në Pekin, për të marrë pjesë në paradën ushtarake kineze me rastin e 80-vjetorit të fitores në Luftën e Dytë Botërore.
Ai ndodhet në këtë vizitë së bashku me vajzën Ju-ae, duke forcuar hipotezat se ajo mund ta pasojë të atin. Sipas një njoftimi të agjencisë KCNA, Kim u prit nga zyrtarë të lartë kinezë, si Cai Qi, anëtar i komitetit qendror të Partisë Komuniste të Kinës, ministri i Jashtëm Wang Yi dhe kryetari i bashkisë së Pekinit, Yin Yong.
Lideri “u takua me zyrtarët kinezë në një atmosferë të ngrohtë” dhe “shprehu mirënjohje për shokun Xi Jinping, partinë, qeverinë dhe popullin kinez për mikpritjen e tyre entuziaste dhe të përzemërt”, thuhej në njoftimin e KCNA.
Ky është udhëtimi i tij i nëntë që nga marrja e pushtetit në fund të vitit 2011, por edhe takimi i parë historik shumëpalësh me Xi dhe Putin, pas një sërë takimesh ballë për ballë me secilin prej tyre dhe me presidentin amerikan Donald Trump.
Pak i prirur për të lënë Penianin, për më shumë se gjashtë vjet Kim nuk kreu asnjë vizitë jashtë vendit. Kthesa ndodhi në mars 2018, me fundin e izolimit ndërkombëtar dhe vizitën e parë zyrtare në Kinë për t’u takuar me Xi Jinping.
Pas udhëtimit të parë në Pekin, të kryer me trenin e tij të përbërë nga dhjetëra vagona të blinduar me ngjyrë jeshile ulliri, pasoi disa muaj më vonë një udhëtim në Dalian, sërish në Kinë, por këtë herë me avion. Të gjitha këto ishin takime përgatitore për samitin historik me Donald Trump, i mbajtur në qershor 2018 në Singapor – takimi i parë mes një lideri të Koresë së Veriut dhe një presidenti amerikan.
Të dy u takuan sërish tetë muaj më vonë në Hanoi, Vietnam, për një samit që zgjati vetëm dy ditë dhe u ndërpre papritur për shkak të dallimeve të mëdha në prioritetet e palëve negociuese. Takimi i tretë mes tyre ndodhi në vitin 2019 në zonën e çmilitarizuar mes dy Koreve.
Ndërkohë, në fillim të vitit 2019 pati edhe një takim të tretë me liderin kinez – sërish me tren – dhe në prill 2019 një samit të parë me presidentin rus Vladimir Putin në Vladivostok. Në të njëjtin qytet pranë kufirit mes Rusisë dhe Koresë, të dy u takuan për herë të dytë në shtator 2023, me rastin e Forumit Ekonomik Lindor.