Dy vëllezër të shpallur në kërkim nga drejtësia në Itali dhe të dënuar me 12 vite burgim në total, janë lokalizuar dhe arrestuar me qëllime ekstradimi nga Policia e Shtetit.
Të prangosurit janë Roland Metushi, 47 vjeç, dhe Saimir Metushi, 45 vjeç, banues në Divjakë.
Aksioni është koduar “Operacionalja 64”, kurse të arrestuarit janë të dënuar për pjesëmarrje në organizate kriminale që trafikonte lëndë narkotike.
“Në vijim të operacioneve të njëpasnjëshme për kapjen e shtetasve të shpallur në kërkim ndërkombëtar, strukturat e Drejtorisë së Forcës së Posaçme Operacionale në Departamentin e Policisë Kriminale në DPPSh, bazuar në informacionet e siguruara për vendndodhjen e dy shtetasve të shpallur në kërkim ndërkombëtar, organizuan dhe finalizuan operacionin policor të koduar “Operacionalja 64”. Në kuadër të operacionit, u bë e mundur kapja dhe arrestimi me qëllim ekstradimin në Itali, i shtetasve të shpallur në kërkim ndërkombëtar”, bëri me dije policia.
Sipas dosjes hetimore, Gjykata e Novarës, në muajin tetor 2024, e ka dënuar Saimir Metushin me 7 vjet burgim, ndërsa Roland Metushin me 5 vjet burgim, për veprat penale “organizata kriminale” dhe “trafikimi i lëndëve narkotike”.
Materialet procedurale mbi arrestimin provizor të këtyre shtetasve, me qëllim ekstradimin e tyre në Itali, u referuan në Prokurorinë pranë Gjykatës së Shkallës Parë të Juridiksionit të Përgjithshëm Fier.
Interpolit Tirana, në bashkëpunim me Interpol Romën, vijon procedurat për ekstradimin e këtyre shtetasve, në Itali.