Çuditë në proceset zgjedhore brenda Partisë Demokratike nuk kanë fund. Ndërsa Sali Berisha thotë se PD-ja po ripërtërihet dhe në vijim do të ndjekë një stratetegji të re që i afron fitoren, lëvizjet e brendshme pasqyrojnë një mentalitet komplet tjetër.
Një rast që dëshmon këtë realitet është ai i Erisa Bajazitit, e cila u zgjodh nënkryetare e Partisë Demokratike, me kuotimin dhe reklamimin e një profili që është prurje e re nga Diaspora, dhe se do të shtojë ndikimin e emigrantëve shqiptarë në vendimmarrjet e forcës politike.
“Diaspora shqiptare, e cila po luan një rol të jashtëzakonshëm dhe mbetet një kundër kësaj diktature, mendojmë se duhet të ketë një nënkryetar të saj në kryesinë e Partisë Demokratike”,- tha Berisha në ditën e mbledhjes së Këshillit Kombëtar.
Por, Bajaziti, nuk duket se është një faktor i fortë politik në Diasporë, që të mund të përçojë si duhet në PD zërin e bashkëkombasve që ndodhen nëpër botë. Të paktën këtë përshtypje jep rezultati i Erisës në zgjedhjet parlamentare të 11 majit 2025, kur ajo kandidonte për deputete e PD-së në listë të hapur dhe mori vetëm 93 vota nga Dipasora.
