Komisionerja e BE-së për Zgjerim, Marta Kos vlerëson se Shqipëria po bën përparim të shpejtë në negociatat e integrimit. Duke sjellë në vëmendje deklaratën e saj javën e kaluar në Parlamentin Evropian, Kos shprehet se Shqipëria është e angazhuar seriozisht në procesin e zgjerimit, duke vënë në dukje arritjet e muajve të fundit në këtë aspekt.
“Negociatat për anëtarësimin e Shqipërisë në Bashkimin Evropian po përparojnë me një ritëm të paparë më parë, siç u theksua, me disa arritje të rëndësishme të realizuara gjatë muajve të fundit dhe me të tjera që priten së shpejti. Shqipëria është angazhuar seriozisht në procesin e zgjerimit, ndërsa BE-ja po e çon përpara këtë proces duke respektuar qasjen e bazuar në meritë. Ne vazhdojmë të mbajmë një fokus shumë të fortë te reformat në fushën e sundimit të ligjit dhe luftës kundër korrupsionit.”, u shpreh Kos.
Kos shton se BE do të qëndrojë pranë Shqipërisë, ndërsa kërkon edhe më shumë angazhim për të bërë të mundur ambicien që ka shprehur qeveria, për të mbyllur të gjithë kapitujr brenda 2027.
“Nga Shqipëria pritet të konsolidojë më tej progresin shumë të mirë në këtë drejtim. Përparimi i shpejtë në negociatat e anëtarësimit është një sinjal i qartë se ne qëndrojmë pranë Shqipërisë dhe jemi sinqerisht të përkushtuar për të përcaktuar një rrugë të qartë drejt anëtarësimit në BE. Zgjerimi është një projekt gjithëpërfshirës për shoqërinë dhe do të kërkohet angazhim i plotë nga e gjithë shoqëria shqiptare për të arritur objektivin ambicioz, por realist, të mbylljes së të gjitha kapitujve të negociatave deri në fund të vitit 2027.”, shton ajo.
Kujtojmë që javën e kaluar u miratua me 502 vota pro dhe 120 kundër progres raporti për Shqipërinë, që vlerësonte ecurinë në rrugën evropiane.
