“Nuk e kam menduar që t’i bashkohem asnjë formacioni që ndan opozitën.” Ky është qëndrimi që duket se do të mbajë Partia Republikane në këtë zgjedhje.
I pyetur në “Off the Record” nga Andrea Danglli mbrëmjen e së dielës në A2 CNN nëse e ka menduar që t’i bashkohet atij që është quajtur si “poli i tretë” në kampin e opozitës, kryetari i kësaj partie politike Fatmir Mediu, deklaroi se me sistemin elektoral që ka vendi ynë aktualisht, ky do të ishte një farë “luksi.”
“Nëse pluralizimi shkon për të mbledhur vota që nuk kthehen në mandate, atëherë këto shkojnë dyfish në favor të Edi Ramës…Politika racionale, është kur votat kthehen në mandate. Prandaj krijuam federatën opozitare, për t’i përfshirë të gjitha partitë politika,” shpjegoi Mediu.
Për këtë situatë, Mediu bën fajtore partinë në pushtet, e cila siç u shpreh ai, me ndryshimet kushtetuese, shkatërroi opozitarizmin.
Por sa fajtor mund të quhet edhe vetë opozita për veprimet e ndërmarra ndër vite?
“Ia kemi dhënë të gatshme Edi Ramës. Idiotësitë e opozitës janë pafund. Me vendimet që ka marrë pas 2013. Qoftë me Reformën në Drejtësi, qoftë me djegien e mandateve,” shpjegon kryetari i PR-së duke shtuar se ai vetë ka qenë kundër këtyre vendimeve.
Megjithatë, Mediu shtoi se gjatë këtyre viteve opozita ka qenë në sulm të vazhdueshëm nga ana e qeverisë, kryetari i së cilës, sipas tij, ka përdor çdo lloj mjeti, qoftë kombëtar apo ndërkombëtar për ta shkatërruar opozitën dhe për ta përçarë.