Një ditë pas ngjarjes tragjike në lagjen nr. 5 të Durrësit, Top Channel ka siguruar pamjet e momentit kur 43-vjeçari Bardh Kaloshi bie në kontakt me energjinë elektrike, sapo prek një shtyllë ndriçimi publik.
Ai humbi jetën pak minuta më vonë. Kaloshi, baba i tre fëmijëve, po shkonte në punë mëngjesin e djeshëm, rreth orës 06:40, kur ndodhi incidenti. Në video shihen momentet dramatike kur ai prek shtyllën dhe më pas rrëzohet në tokë, ndërsa disa qytetarë që tentuan ta ndihmojnë u tërhoqën, pasi ndjenë goditje elektrike edhe vetë.
Nga hetimet paraprake dyshohet se shkak i tragjedisë ka qenë dëmtimi i izolimit të kabullit të brendshëm në majë të shtyllës, që në kontakt me ujin ka përçuar rrymën në trupin metalik.
Policia ka marrë në pyetje dëshmitarë dhe ka nisur procedim penal për rastin, pa përcaktuar ende të dyshuar konkret, ndërsa i janë dërguar shkresa OSHEE-së dhe ndërmarrjes “Rruga” të bashkisë.
Ndërkohë, banorët thonë se për të njëjtën shtyllë ishte bërë një ankesë që në fund të gushtit, kur pati reshje shiu, pasi një i ri kishte ndjerë rrymë teksa lidhte biçikletën aty.
Ankesa nuk është ndjekur pasi ndriçimi publik është kompetencë e bashkisë dhe punonjësi i OSHEE-së nuk e ka përcjellë më tej.
Moskoordinimi institucional rezultoi fatal për Kaloshin. Aktualisht, shtylla është jashtë funksionit, ndërsa bashkia nuk ka dhënë koment, pasi është në pritje të hetimeve.
Trupi i Kaloshit është përcjellë sot për në banesën e fundit, mes dhimbjes së familjarëve që kërkojnë drejtësi.