Transferimi i Erion Veliajt në burgun e Fierit ka shkaktuar reagimin e mediave të lidhura me kryebashkiakun e Tiranës. Kryeministri Rama, në mbledhjen e fundit të grupit parlamentar socialist, u ka thënë deputetëve se ka prova që Veliaj ka financuar protestën e studentëve dhe ka pasur komunikime telefonike nga burgu, duke argumentuar kështu edhe transferimin e tij.
Megjithatë, mediat e lidhura me kryebashkiakun janë hedhur në sulm kundër ish-zëvendëskryeministres Balluku, në formë hakmarrjeje për këtë transferim, i cili tashmë ka marrë më shumë vëmendje se çdo çështje tjetër që lidhet me Veliajn.
Mediat e Carlo Bollinos dhe Irfan Hysenbelliut, të njohura për lidhjet e forta me kryebashkiakun e Tiranës, duke gërmuar në dosjen tashmë të mbyllur dhe të bërë gati për gjykim të Ballukut, kanë sulmuar sot ish-zëvendëskryeministren me pretendimin se në banesën e saj ka pasur shuma të mëdha eurosh.
I veçuar nga elementet e tjerë të dosjes, përfshirë deklaratat e dëshmitarëve që hedhin poshtë këtë pretendim, ky sulm pa fakte dhe i papritur ndaj Ballukut risjell në vëmendje dashurinë mes Bollinos dhe Erion Veliajt.
Ndërsa Hysenbelliu ka shkuar edhe më tej. Ka marrë foton e Bollinos dh me Chat GTP i ka hequr logon pa e vënë re se Inteligjenca Artificiale i aka kthyer gjuhën shqipe në hieroglife.
Kujtojmë se në përgjimet e publikuara gjatë vitit 2025, Veliaj përmendte drejtpërdrejt botuesin Carlo Bollino dhe kërkonte nga familjarët të komunikonin me të për organizimin e intervistave dhe përcjelljen e qëndrimeve të tij në media. Kjo e bën të arsyeshëm dyshimin se sulmet e sotme ndaj Ballukut nuk janë të pavarura, por të ndikuara nga situata që po kalon Veliaj dhe përkeqësimi i marrëdhënieve të tij me Edi Ramën.