Pas javësh të tëra misteri, debatesh në Komisione, hetimesh intensive nga opozita dhe akuzave se ku fluturuan plot 4.2 milionë euro nga fondi i emergjencës i shtetit shqiptar për koncertin e Kanye West, e vërteta më në fund ka dalë në dritë. Dhe nuk bëhet fjalë për skena madhështore, as për ndonjë “Eagle Stadium” të improvizuar apo bileta të shpërndara falas për administratën.
Sipas dokumenteve të sapozbuluara sekrete, i gjithë fondi i emergjencës ka përfunduar i palosur mirë, me prerje 500-euroshe, direkt e te gusha e Ministrit të Ekonomisë, Kulturës dhe Inovacionit, Blendi Gonxhja.
Ekspertët mjeko-ligjorë dhe ata të financave mbetën të shtangur kur panë se gusha e ministrit nuk ishte thjesht një pasojë e darkave të punës, por një strukturë e mirëfilltë inxhinierike, e projektuar posaçërisht si një “kasafortë anatomike” prej meshini.
“Ne mendonim se po financonim turizmin kulturor dhe po sillnim standarde botërore në Tiranë,” u shpreh një burim i brendshëm nga Ministria, në kushte anonimati. “Por rezulton se ‘gusha’ ishte i vetmi projekt inovativ që u realizua me sukses të plotë 100%. Aty ka kapacitet të mjaftueshëm për të mbajtur jo vetëm 4.2 milionë eurot e Kanye, por edhe buxhetin e ardhshëm për mbrojtjen nga përmbytjet.”
I pyetur nga gazetarët mbi këtë zbulim tronditës, Kryeministri Edi Rama doli menjëherë në mbrojtje të ministrit të tij, duke i quajtur akuzat “makth të korbave dhe sorrave të bulevardit”.
“Dëgjoni këtu, o analfabetë funksionalë,” deklaroi Kryeministri i veshur me nallane të zeza dhe çorape të kuqe. “Ajo nuk është gushë e babëzitur. Ajo është një instalacion i gjallë i artit bashkëkohor conceptual! Është një bunker portativ financiar që mbron valutën e huaj nga inflacioni global. Blendi thjesht po e mban aty për ta ngrohur, që paratë të mos ftohen përpara se të shkojnë te Kanye. Kush thotë të kundërtën nuk e kupton artin, dhe mbi të gjitha, nuk e do Shqipërinë turistike!”
Nga ana tjetër, vetë ministrit Gonxhja iu desh të mbante një qëndrim të kujdesshëm gjatë seancës së fundit. Ai u pa të mbante kokën paksa mbrapa, i kujdesshëm që të mos i derdhej asnjë fletë 500-euroshe gjatë fjalës së tij mbi “suksesin spektakolar të eventit që do të mbahet mend gjatë”.
Ndërkohë, SPAK raportohet se ka nisur hetimet, jo për të sekuestruar paratë, por për të parë nëse gusha e ministrit i plotëson kriteret e ndërtimit pa leje sipas Kodit Urbanistik të Tiranës.
/Ministria e së Vërtetës