Gazetari Frrok Çupi, i ftuar në emisionin “Real Story”, u shpreh se Greqia po “luan me zjarrin” pasi po tenton të ndërhyjë në punët e brendshme të Shqipërisë.
Sipas Çupit, Greqia me këto veprime kërkon që faktori shqiptar të tërhiqet në konflikt. Ai theksoi se Shqipëria është i vetmi shtet në rajon që nuk ndodhet në konflikt dhe që, sipas tij, luan rol stabilizues në Ballkan.
“Fakti që një prokurore nis një hetim kryesisht do të thotë që çështja është marrë seriozisht. Nisja kryesisht e një hetimi të rëndësishëm dëshmon se kjo nuk ndodh në Shqipëri. Greqia po luan me zjarr. Është kryer dramë dhe tragjedi. Çamëria vjen për të mbuluar një “pisllëk” grek.
I gjithë qëllimi është kapja e Tiranës. Duhet të bjerë Tirana. Greqia po sulmon Tiranën që të marrë qeverinë. Kjo është e drejtpërdrejtë. Shteti grek nesër mund të nxjerrë tanket, sipas mendjes së vet, por nuk e besoj sepse sot bëri zullumin më të madh, sepse e sulmoi me civilë Shqipërinë. Nuk është protestë e njerëzve.
Është shumë e qartë, i gjithë qëllimi është që faktori shqiptar të tërhiqet në konflikt. Shqipëria është i vetmi faktor në rajon dhe Ballkan që nuk është në konflikt. I vetmi faktor që ruan stabilitetin është shteti shqiptar. Tërheqja e këtij shteti në konflikt do të thotë se do të krijohet një unazë zjarri që ndan Europën me Rusinë.”, tha ai.
