Tashmë që po afron fundi i vitit 2023, mediet botërore bëjnë një bilanc, një listim dhe renditje të figurave nga fusha të ndryshme, të artit, shkencës, letërsisë, et., që kanë ndikuar në forma të ndryshme gjatë vitit që po lëmë pas. Siç shkruan revista amerikane “Financial Times”, “ndikimi – fuqia për të bindur, për të mbrojtur ndryshimin dhe për të imagjinuar mënyra më të mira për të bërë gjërat – merr shumë forma”.
Gjatë disa muajve, revista ka punuar për të nxjerrë numrin e përvitshëm “Gratë e Vitit”, një listë e grave me influencë të nominuara nga gra të tjera të fuqishme në skenën ndërkombëtare, në konsultim me qindra gazetarë të FT në dhjetëra zyra, si dhe me lexuesit dhe drejtuesit e industrisë.
Rezultati përfundimtar është një listë e mbushur me gra që kanë marrë vlerësime prestigjioze, por edhe çmimet Nobel, Pulitzer, Grammy dhe Kupat e Botës dhe përmban emra të tillë si: Margot Robbie, Beyoncé, Barbara Kingsolver, Ursula von der Leyen, Olena Zelenska apo Narges Mohammadi.
Mes tyre gjendet edhe vlonjatja Mira Murati, shumë e përfolur javët e fundit, pas emërimit të përkohshëm në krye të Open AI. Nominimi i saj është bërë nga Marissa Mayer, bashkëthemeluese dhe shefe ekzekutive e startup-it të inteligjencës artificiale Sunshine, e cila ka bërë edhe një bio të Muratit.
Mira Murati, CTO
Mira Murati, shefe e teknologjisë së OpenAI, është në krye të transformimit të thellë dixhital të këtij momenti. E lindur në Shqipëri, Mira tani jeton në epiqendrën e evolucionit të shpejtë të inteligjencës artificiale. Produktet novatore të OpenAI, ChatGPT dhe Dall-E, kanë rrëmbyer imagjinatën e botës dhe do të ndryshojnë rrënjësisht mënyrën se si ne punojmë, mësojmë dhe shprehemi në mënyrë krijuese.
Udhëheqja vizionare e Mirës shtrihet shumë përtej shkencës dhe kërkimit të modeleve të mëdha gjuhësore në dizajnimin se si të inkorporojmë AI në jetën tonë të përditshme, por edhe si të zhvillojmë AI me përgjegjësi në lidhje me sigurinë dhe rregulloren.
Tepër e menduar në parashikimin e ndërveprimeve njerëz-AI, Mira mbron në mënyrë aktive testimet e hapura, publike – duke na inkurajuar të kapim këtë moment unik në kohë, e për të zbuluar se si teknologjia do të na riformojë dhe ne do e formësojmë atë. Si një gjë e rrallë e dukshme – një grua që drejton një kompani teknologjike – historia dhe lidershipi i Mirës janë po aq frymëzues sa teknologjia që përcakton të ardhmen që ajo mbikëqyr./Liberale.al
