Një gjykatë e apelit në Nju Jork ka hequr gjobën prej 500 milionë dollarësh që Presidenti Donald Trump ishte urdhëruar të paguante vitin e kaluar në një proces civil për mashtrim.
Gjykatësi Arthur Engoron kishte vendosur gjobën për shkak të vlerësimit të tejskajshëm të pasurive të Trump Organization për të marrë kredi të favorshme. Në vendimin e gjatë të publikuar të enjten, gjykatësit e Divizionit të Apelit të Gjykatës Supreme të Nju Jorkut thanë se ndërsa Trump ishte përgjegjës për mashtrimin, gjoba e afro 500 milionë dollarëve ishte e tepruar dhe mund të shkelte të drejtat kushtetuese kundër dënimeve të ashpra.
Trump, në një postim në rrjetin e tij social Truth Social, e quajti vendimin “fitore totale”.
“Respektoj shumë faktin që Gjykata pati guximin të rrëzonte këtë vendim të paligjshëm dhe turpërues që po dëmtonte biznesin në të gjithë Nju Jorkun”, shkroi ai.
Zyra e Prokurorit të Përgjithshëm të Nju Jorkut, e cila kishte ngritur çështjen, e cilësoi vendimin gjithashtu një fitore, pasi gjykatësit konfirmuan përgjegjësinë e Trump për mashtrim dhe nuk hoqën dënimet e tjera jo-financiare. Zyra planifikon të apelojë vendimin për gjobën te gjykata më e lartë e shtetit.
Në procesin kundër Trump, dy djemve të tij të rritur dhe Trump Organization, gjykatësi Engoron gjithashtu e ndaloi Trump të shërbente si drejtor i kompanisë ose të merrte kredi nga bankat në shtet për tre vjet. Ky dënim dhe të tjerët jo-financiarë mbeten në fuqi pas vendimit të enjtes.
Vendimi i gjatë prej 323 faqesh tregoi mosmarrëveshje mes pesë gjykatësve në panel. Ata ishin të ndarë kryesisht mbi meritën e padisë origjinale të ngritur nga Letitia James, e cila kishte akuzuar Trump dhe djemtë e tij për “mashtrim të përsëritur dhe të vazhdueshëm”.
Në shtator 2023, gjykatësi Engoron kishte vendosur se Trump ishte përgjegjës për mashtrim biznesi, duke konstatuar se ai kishte paraqitur pasurinë e tij me qindra miliona dollarë më shumë se realiteti. Një gjykim tjetër u mbajt në 2024 për të përcaktuar gjobën.
Vendimi i fundit është konsideruar nga ekspertët si një mënyrë për të shtyrë vendimin përfundimtar te gjykata më e lartë e Nju Jorkut, duke lënë të hapur zhvillimet e mëtejshme të çështjes James kundër Trump.