Deputeti i Partisë Demokratike, Tomor Alizoti, ka komentuar situatën politike pas zgjedhjeve parlamentare të 11 majit, duke ngritur dyshime serioze mbi legjitimitetin e procesit dhe rezultatin e tij.
I ftuar në studion e News24, Alizoti u shpreh se logjika e zgjedhjeve ka rënë, kur kandidatë pa asnjë profil publik apo politik marrin më shumë vota se figura të konsoliduara të politikës.
“Nuk ka sens që një njeri që nuk e njeh askush dhe nuk ka një koncept politik të marrë më shumë vota se Jorida Tabaku e cila garoi në Tiranë,” – u shpreh Alizoti, duke shtuar se kjo është një provë që tregon ndërhyrjen e grupeve të strukturuara të dyshimta.
Ashtu si Berisha, edhe Alizoti tha se ne një proces zgjedhor ku një parti përballet me kartelet, policinë dhe qeverinë nuk mund të quhet më proces zgjedhor. Ai e cilësoi këtë si një farsë që i heq çdo kuptim garës politike reale.
“Nëse Pandeli Majko, një figurë e lartë e PS, do të mundte dikë nga PD, kjo do ishte e kuptueshme. Por kur anonimë marrin vota më shumë se liderë politikë të njohur, është e qartë se ka diçka që nuk shkon,” përfundoi ai.
