Juristi Kreshnik Spahiu ka komentuar ashpër qëndrimet e kreut të Partisë Demokratike, Sali Berisha, ndaj Bashkimit Europian dhe ambasadorit të BE-së në Shqipëri, Silvio Gonzato.
Spahiu u shpreh se Berisha po dëmton imazhin e Shqipërisë në arenën ndërkombëtare, duke e paraqitur vendin në mënyrë negative sa herë ka mundësi të flasë në forume europiane.
Sipas tij, opozita shqiptare është ndër të paktat në Europë që, për shkak të betejës së brendshme politike, shkon deri në pikën e pengimit të proceseve integruese të vendit. Spahiu tha se debati për integrimin europian po shihet përmes interesave partiake dhe jo si një objektiv kombëtar.
Ai theksoi se Shqipëria ka ende probleme dhe standarde që duhen përmbushur, por kjo nuk do të thotë që politika shqiptare duhet të lobojë kundër vendit në Bruksel.
“Kemi një Shqipëri pa standarde, e duam në BE apo jashtë BE-së? Të shkojmë të gjithë të ankohemi në BE mos na fusni se nuk i plotësojmë standardet? Kjo kërkon një përgjigje”, deklaroi Spahiu për “Report Tv”.
Juristi u ndal edhe te perceptimi politik për integrimin europian, duke thënë se shqiptarët janë ndarë sipas bindjeve partiake.
Sipas tij, socialistët e shohin integrimin si një sukses të Shqipërisë, ndërsa një pjesë e demokratëve e perceptojnë si një fitore personale të Edi Ramës, çka sipas Spahiut ka sjellë tension dhe retorikë kundër procesit të integrimit.
Ai shtoi se përgjegjësia për suksesin ose dështimin e negociatave me Bashkimin Europian bie mbi qeverinë, por kjo nuk justifikon sulmet ndaj Shqipërisë apo partnerëve ndërkombëtarë.
Në deklaratën e tij, Spahiu kritikoi edhe sulmet e vazhdueshme të Berishës ndaj ambasadorëve të huaj, veçanërisht ndaj ambasadorit të Bashkimit Europian, Silvio Gonzato. Ai e konsideroi paradoksale faktin që Berisha zgjedh të sulmojë pikërisht institucionin ku kërkon mbështetje dhe ankohet vazhdimisht: “A ka të drejtë Berisha për atë që thotë, që të shkojë në BE dhe të shajë atdheun e vet?”.
Spahiu komentoi gjithashtu edhe përplasjet e fundit politike lidhur me integrimin europian dhe deklaratat e Berishës ndaj përfaqësuesve të BE-së, duke i cilësuar ato të dëmshme për opozitën dhe për imazhin e Shqipërisë.
Ai tha se edhe në rast se Shqipëria nuk arrin të bëhet pjesë e Bashkimit Europian, kjo nuk do të sillte automatikisht ndryshim pushteti në vend.
Spahiu reagoi ashpër edhe ndaj përfshirjes së jetës personale të ambasadorit Gonzato në debatin politik, duke e cilësuar të papranueshme një qasje të tillë: “Edhe të shkosh të ankohesh në BE dhe të merresh me gjininë dhe prirjet seksuale të ambasadorit të BE, kjo është e turpshme”.
