Papa Leoni XIV ka ushtruar të drejtën e tij të votës si shtetas amerikan, duke dërguar me postë fletën e votimit për zgjedhjet e ardhshme të mesmandatit në Shtetet e Bashkuara. Ky veprim përbën një rast të paprecedentë, pasi nuk ka të dhëna për ndonjë Papë tjetër që të ketë votuar pasi është zgjedhur në krye të Kishës Katolike, shkruan Ansa.
Lajmi u konfirmua nga Zyra e Shtypit e Selisë së Shenjtë, e cila bëri të ditur se Papa ka dërguar fletën e tij të votimit me postë drejt Çikagos, në përputhje me praktikën e tij të mëparshme të pjesëmarrjes në proceset demokratike. (foto: Ansa)
Konfirmimi i Vatikanit erdhi pas raportimit të gazetës “Chicago Sun-Times”, sipas së cilës Robert Francis Prevost, emri i lindjes së Papës, figuron në listën e personave që kanë kërkuar të votojnë me postë në zgjedhjet e ardhshme në shtetin e Illinois.
Sipas Kim Fladhammer, drejtues i stafit në zyrën e sekretarit të qarkut Will, emri i Prevost është regjistruar mes votuesve që kanë paraqitur kërkesë për votim me postë. Kërkesa është regjistruar më 3 tetor në zyrën e sekretarit të këtij qarku, në zonën metropolitane të Çikagos.
Papa figuron në regjistrin zgjedhor me emrin e tij civil dhe me adresën e vëllait të tij, John, në qytetin New Lenox.
Në deklaratën e saj, Selia e Shenjtë bëri të ditur gjithashtu se Papa ka votuar edhe gjatë viteve kur ka jetuar në Peru, sa herë që i është krijuar mundësia.
“Ati i Shenjtë shpreh bindjen e tij lidhur me të drejtën dhe detyrën e qytetarëve për të marrë pjesë në proceset demokratike”, thuhet në komunikimin e Vatikanit.
Papa Leoni XIV ka tri shtetësi: atë të Vatikanit, të Perusë dhe të Shteteve të Bashkuara. Votimi i tij në zgjedhjet e mesmandatit, tashmë si kreu i Kishës Katolike, shënon një rast të veçantë në historinë e papatit.