Drejtori i përgjithshëm i Shërbimit Zjarrfikës, Arben Cara, është dorëhequr nga detyra, në një kohë kur vendi po përballet me një situatë të rënduar nga zjarret. Mësohet se Cara e ka paraqitur dorëheqjen një ditë më parë, ndërsa këtë të martë është firmosur urdhri për largimin e tij nga detyra.
Deri më tani mbeten të paqarta arsyet që kanë çuar në dorëheqjen e kreut të Shërbimit Zjarrfikës, si dhe nëse vendimi lidhet me situatën aktuale të zjarreve në vend.
Largimi i Carës vjen pikërisht në një periudhë të ngarkuar për strukturat zjarrfikëse, të cilat janë angazhuar në përballimin e vatrave të zjarrit në zona të ndryshme të vendit.
Për momentin nuk ka informacion zyrtar mbi motivet e dorëheqjes apo se kush do ta zëvendësojë Arben Carën në drejtimin e Shërbimit Zjarrfikës. Cara u komandua në këtë detyrë në shkurt të vitit 2024 duke zëvendësuar Holta Kominon.
