Shpërthimi i revoltës më të fuqishme studentore që ka njohur vendi, i ka cilësuar kreu i Partisë Demokratike Sali Berisha protestat e 5 ditëve të fundit që kanë përfshirë Tiranën dhe disa qytet të vendit.
Në një komunikim me qytetarët në rrjetet sociale, kreu i selisë blu tha protestat e studentëve dhe gjimnazistëve dëshmojnë se të rinjtë nuk pajtohen me atë që ai e cilësoi si “narkoshtet” dhe diktaturë autokratike të Edi Ramës.
Sipas Berishës, të rinjtë po luftojnë jo vetëm për të ardhmen e tyre, por edhe për fëmijët e çdo shqiptari, me synimin që ëndrrat t’i realizojnë në Shqipëri.
Ai u bëri thirrje qytetarëve dhe prindërve që të mbështesin protestuesit, duke akuzuar qeverinë për korrupsion, vjedhje të fondeve publike dhe largimin e të rinjve nga vendi.
“Java ishte java e eksplozionit të revoltës më të fuqishme studentore që ka njohur vendi.
Ishte java në të cilën studentët e universitetit të Tiranës, gjimnazeve të Tiranës dhe më pas gjimnazeve të qarqeve Shkodër, Durrës, Vlorë, Elbasan, Korçë, Gjirokastër, universitetet e këtyre qarqeve dhe gjimnazet e këtyre qyteteve, dhe së fundmi dje greva e përgjithshme dhe gjimnazistëve në mbarë vendin, ishin zhvillimet më shpresëdhënëse, me jehonën më të madhe ndërkombëtare.
Ishin zhvillimet që dëshmuan, se rinia shkollore e Shqipërisë nuk pajtohet kurrë me narkoshtetin shqiptar, diktaturën autokratike të bazuar në drogën, krimin dhe vjedhjen e shqiptarëve.
Se rinia e universiteteve dhe gjimnazeve të vendit nuk pranon më tutje piramidën e mashtrimit mediatik dhe propagandist që iu është bërë atyre në vite e vite.
Duke paraqitur farsën zgjedhore si votë të lirë. Duke paraqitur produktet e drogës si suksese.
Duke mashtruar me idealet evropiane të cilat në të vërtetë rrënoheshin çdo ditë e më shumë. Duke korruptuar shtetin në çdo qelizë, gjuhën dhe mendimin.
Rinia studentore dhe e gjimnazeve të vendit u ngrit mbi këtë gërmadhë, e vendosur të luftojë për të ardhmen e saj të vërtetë në Shqipëri.
Në këtë kuadër, këta të rinj po luftojnë në të vërtetë për çdo shqiptar, për fëmijët e çdo shqiptari të ndershëm, po luftojnë që ëndrrat e tyre t’i ndërtojnë në Shqipëri.
Besoj se çdo qytetar, çdo prind, çdo burrë dhe grua, kudo që punon duhet të ndjejë përgjegjësinë reale ndaj tyre sepse narkoshteti nuk zbriti nga qielli.
Narkoshteti dhe Padrino që vrau, që dogji si zjarrvënësi më i egër i shqiptarëve, dogji ëndrrat e qindra mijëra të rinjve dhe i detyroi ata të largohen nga Shqipëria, nuk zbriti nga qielli, por ishte këtu midis nesh.
Edhe si një akt reflektimi që u pranua de facto të ndërtohet para syve tanë shteti i drogës.
U pranua de facto që zgjedhjet të shndërrohen në farsë të turpshme zgjedhore dhe përsëri të quhen zgjedhje.
Edhe për faktin se kanë shpërthyer me dhjetëra e dhjetëra skandale, të cilat faktojnë vjedhjen e miliarda e miliarda eurove nga pronat publike dhe buxheti i shtetit, u vazhdua me të njëjtën tolerancë.
Pra, në njëfarë mënyre këta djem dhe vajza të mençur dhe guximtarë po përballen sot me egërsinë më të madhe të sistemit të bazuar në drogë që u ndërtua para syve tanë.
Të sistemit që u bazua në vjedhjen e shqiptarëve, ndaj të cilit nuk u reagua siç reagon çdo komb i qytetëruar kur ndjehet i vjedhur.
Pra, ka një detyrim madhor ndaj këtyre të rinjve nga shoqëria shqiptare që të derdhet në rrugë dhe t’i mbështesë”, u shpreh Berisha.
“Skena horror” i ka cilësuar kreu demokrat Sali Berisha pamjet e dhunës në protestë. Në një komunikim me qytetarët në rrjetet sociale, Berisha akuzoi Policinë për dhunë barbare ndaj studentëve gjatë protestave.
Ai u bëri thirrje qytetarëve, prindërve, gjyshërve dhe bizneseve që t’u bashkohen studentëve në protestë, duke e cilësuar lëvizjen e tyre si një betejë për shpëtimin e Shqipërisë.
Sipas kreut të selisë blu studentët kanë të drejtë të kërkojnë përmbysjen e sistemit, i cili theksoi ai bazohet te droga, korrupsioni dhe vjedhja e pasurive publike. Kreu i PD-së siguroi se partia e tij do të vijojë t’u japë studentëve mbështetje dhe mbrojtje maksimale, duke i cilësuar protestat si një “revoltë shpëtimtare për Shqipërinë”.
Burimi: Politika