Ministri i Mbrojtjes, Ermal Nufi, do të zhvillojë të hënën një vizitë zyrtare në Athinë, ku do të pritet nga homologu i tij grek, Nikos Dendias.
Sipas mediave greke, takimi do të nisë me një bisedë kokë më kokë mes dy ministrave, e cila do të pasohet nga një takim i zgjeruar me delegacionet përkatëse në ambientet e Ministrisë së Mbrojtjes së Greqisë.
Në qendër të diskutimeve pritet të jenë forcimi i bashkëpunimit dypalësh në fushën e mbrojtjes, siguria rajonale, si dhe shkëmbimi i pikëpamjeve mbi zhvillimet rajonale dhe ndërkombëtare në fushën e sigurisë.
Vizita e Nufit në Athinë vjen pak ditë pasi ministri grek i Mbrojtjes, Nikos Dendias, zhvilloi një vizitë zyrtare në Tiranë, ku u takua me homologun shqiptar dhe me kryeministrin Edi Rama. Pas takimeve në kryeqytetin shqiptar, Dendias deklaroi se me Ramën diskutoi situatën më të gjerë gjeopolitike dhe zhvillimet në Mesdheun Lindor, ndërsa me ministrin Nufi bisedoi për thellimin e bashkëpunimit në fushën e mbrojtjes dhe për çështje që lidhen me marrëdhëniet dypalëshe.
Gjatë vizitës në Tiranë, ministri grek i Mbrojtjes i përcolli homologut shqiptar edhe ftesën për të zhvilluar një vizitë zyrtare në Athinë, e cila pritet të konkretizohet të hënën.
Vizita zhvillohet në një periudhë të shtimit të kontakteve diplomatike mes Tiranës dhe Athinës, ndërsa në javët në vijim në Shqipëri priten edhe vizita të tjera të zyrtarëve të lartë grekë në kuadër të axhendës dypalëshe dhe takimeve rajonale.
