SPAK ka paraqitur kërkesën për dënimin e Fatime Kryemadhit në kuadër të fraksionit të dosjes “Meta”. Prokuroria ka kërkuar 7 vite e 6 muaj burg, ndërsa pas aplikimit të gjykimit të shkurtuar dënimi përfundimtar llogaritet në 5 vite burg.
Në pretencën e dorëzuar në Gjykatën e Posaçme, SPAK ka kërkuar që dënimi të pezullohet dhe Fatime Kryemadhi të vendoset në shërbim prove për një periudhë 5-vjeçare.
Krahas dënimit, prokuroria ka kërkuar edhe sekuestrimin e vilës në zonën e Kodrës së Diellit, si pjesë e masave të kërkuara në kuadër të procedimit penal.
Fatime Kryemadhi po gjykohet në GJKKO së bashku me Ema Çokon dhe Pirro Xhixhon, në një proces që lidhet me akuzat për pastrim parash dhe korrupsion.
Gjatë leximit të pretencës, SPAK është ndalur te pasuritë, kontratat dhe burimet financiare që sipas hetimeve lidhen me të pandehurit.
Prokuroria ka përmendur edhe të dhënat e siguruara nga telefoni i sekuestruar në banesën e Fatime Kryemadhit, të cilat sipas akuzës kanë ndihmuar në zbardhjen e disa elementëve të hetimit.
Në vijim të procesit, GJKKO do të shqyrtojë kërkesat e SPAK dhe qëndrimet e mbrojtjes përpara marrjes së vendimit përfundimtar.
SPAK ka paraqitur në Gjykatën e Posaçme kërkesën për dënimin e Ema Çokon, një nga të pandehurat në fraksionin e dosjes “Meta”. Prokuroria ka kërkuar 7 vite burg, ndërsa pas aplikimit të gjykimit të shkurtuar dënimi ulet në 4 vite e 8 muaj burg.
Në pretencën e paraqitur në GJKKO, SPAK ka kërkuar pezullimin e dënimit për Ema Çokon dhe vendosjen e saj në shërbim prove për një periudhë 5-vjeçare.
Ema Çoko po gjykohet në kuadër të dosjes “Meta”, ku përballet me akuzën e pastrimit të parave.
